Vitali Borisov: Püşkatmada bəxtimiz gətirmədi
Futzal üzrə Azərbaycan yığmasının üzvü Vitali Borisov Kolumbiyada keçiriləcək dünya çempionatında İspaniya, İran və Mərakeşlə bir qrupa düşməyimizə münasibət bildirib. Azerisport.az saytına açıqlamasında o, bunları söyləyib:
"Püşkatma bizim üçün gec başlasa da (Bakı vaxtı ilə saat 3:00-da), ona canlı baxmağa qərar verdim. Bizim heç də bəxtimiz gətirmədi. Dünyanın ən yaxşı komandaları ilə bir qrupa düşdük. İranla İspaniya qrupumuzun favoritidir. Mərakeş yığmasını xüsusi tanımıram. Amma vaxtilə qarşılaşdığımız Belçika və Hollandiya yığmalarının heyətində çoxlu Mərakeş əsilli oyunçulara rast gəlmişik. Buna əsasən bu komandanın texnikalı oyunçularan təşkil olunduğunu proqnozlaşdırmaq olar. Hədəf yenə də qrupdan çıxmaqdır. Şansımız var. Çox şey turnirə hansı formada hazırlaşmağımızdan asılı olacaq. Bütün rəqiblərlə oynamaq olar. İlk oyundan da çox şey asılıdır. Biz mütləq Mərakeşə qalib gəlməliyik".
