Fərhad Vəliyev: Baş məşqçi oyundan sonra tək mənə yox, hamımıza irad bildirdi
"Qarabağ"ın qapıçısı Fərhad Vəliyev Topaz Premyer Liqasının 35-ci turu çərçivəsində "Rəvan"a uduzduqları oyunu şərh edib. Azerisport.az saytına açıqlamasında o, bunları söyləyib:
"Qələbə seriyamızı davam etdirmək istəyirdik. Amma belə alındı. Uduzmağı heç kim xoşlamır. Matçın böyük hissəsini azlıqda keçirdik, penaltidən qol buraxdıq. Bu da komandamızın çıxışına təsirini göstərdi. Buna baxmayaraq, hesabı bərabərləşdirə bildik. İkinci yarıda isə öz səhvimizdən qapımızda daha bir qol gördük. Həmin epizodda futbolçumuzun açıldığını görüb, ona ötürmə etdim. Namiq topun rəqibə dəyməsini istəməzdi. Amma belə alındı. Oyundan sonra Qurban Qurbanov tək mənə yox, bütün oyunçulara irad bildirdi. O, ikinci hissədə daha çox hücum etməyimizin lazım olduğunu söylədi. Lakin biz az epizod yaratdıq".
