Budaq Nəsirov: Milliyə dəvəti arzulasam da, gözləmirdim

"Kəpəz"in yarımmüdafiəçisi Budaq Nəsirov Azərbaycan millisinin qarşıdakı Avstriya toplanışına dəvət almasına münasibət bildirib. Azerisport.az saytına açıqlamasında o, bunları söyləyib:

"Bunu nə qədər çox arzulasam da, yığmadan dəvət gözləmirdim. Məşqdən sonra menecer zəng etdi və yığmaya dəvət aldığımı bildirdi. Buna görə çox şadam. Ümid edirəm ki, özümü göstərə biləcəyəm".

Nəsirov bu dəvətin onun üçün niyə gözlənilməz olduğunu da açıqlayıb: "Çünki adım ilkin açıqlanan siyahıda yox idi. Mənim adımı sonradan həmin siyahıya daxil etdilər. Etiraf edim ki, milliyə çağırılacağımı düşünmürdüm də. Yığmaya layiq olub-olmadığıma dair fikir bildirmək istəmirəm. Baş məşqçi hər şeyi özü görür və kimləri dəvət etmək lazım olduğunu yaxşı bilir. Əlbəttə, həyəcan var. Çünki bu, mənim milliyə ilk dəvətimdir".

Qeyd edək ki, baş məşqçi Robert Prosineçki daha iki futbolçu ilə yanaşı, Budaq Nəsirovu da mayın 27-də Avstriyadan Sloveniyaya, U-21 yığmamızın düşərgəsinə yollayacaq.

Nəsirov mövsümün son turu çərçivəsində "Qəbələ"yə qarşı keçirəcəkləri oyundan və bürünc medl qazanmaq şanslarından da söz açıb: "Bizə "İnter"in xal itirməsi sərf edəcək. Amma öz oyunumuz zamanı digər görüşün nəticəsi ilə maraqlanmayacağıq. Öz oyunumuza köklənməliyik. Üçüncü yeri tutacağımıza çox ümidliyəm. İstərdim, bu tur "Zirə" "İnter"ə qalib gəlsin, biz də "Qəbələ"yə. Biz bu heyətlə bürünc medallar uğrunda mübairzə apara biliriksə, Avropa Liqasında niyə uğur qazanmayaq ki? Allah eləsin ki, Avropada da öz gücümüzü göstərə bilək".