Vəli Qasımov: Qəbələ daha çox pul versə, Jayro gedə bilər

"Neftçi"nin baş məşqçisi Vəli Qasımov yay transfer planlarından söz açıb. Azerisport.az saytına açıqlamasında o, bunları söyləyib:

"Qəbələ"nin Jayro ilə maraqlandığını mətbuatdan oxumuşam. Amma heç bir rəsmi təklifdən xəbərim yoxdur. Bir neçə gün əvvəl futbolçunun özü ilə söhbət etdim. Məni inandırdı ki, heç bir problem olmayacaq. Hələ heç bir futbolçu ilə yeni müqavilə barədə danışığımız olmayıb. Bu danışıqlara mövsüm başa çatandan sonra start verəcəyik. Əlbəttə, "Qəbələ" daha çox pul versə, futbolçu gedə bilər. Biz kimisə lehimizə qərar verməyə məcbur edə bilmərik. Elşən Abdullayevə gəlincə, o, "Neftçi"nin yetirməsidir. Onu elə-belə buraxmayacağıq. Onun böyük gələcəyi var. Şübhəsiz ki, bunun üçün öz üzərində çox çalışması lazımdır. Elşən "Neftçi"dən getsə, güclü kluba keçəcək, daha Türkiyə 1-ci liqasına yox".