Abdullayev 200-ü qolla qeyd etdi
Araz Abdullayev kapitanı olduğu “Neftçi”nin heyətində 200-cü oyununu keçirib. Azerisport.az xəbər verir ki, yarımmüdafiəçinin yubileyi Topaz Premyer Liqasının 35-ci turunun “İnter”lə ev oyununa təsadüf edib.
Bunadək “ağ-qaralar”ın heyətində bütün turnirlərdə ümumilikdə 199 matç keçirən Abdullayev komandasının 4:2 hesablı əzmkar qələbə qazanmasına 1 qolla da töhfə verib. Bu, onun 200-cü matçda 31-ci qolu olub.
Araz ardıcıl 2-ci tur “Neftçi”də yubiley qeyd edir. 34-cü turun “Kəpəz”lə səfər matçında Premyer Liqada 150-ci oyununa çıxan yarımmüdafiəçi 200 matçın artıq 151-ni çempionatda keçirib. O, ölkə kubokunda 27, Superkubokda 1, avrokuboklarda 21 dəfə ağ-qara forma geyinib.
Xatırladaq ki, Araz 2008/09 mövsümündə debüt etdiyi “Neftçi”nin indiki heyətində komandada ən çox oyun keçirən futbolçudur. (PFL)
