Cavid Tağıyev: Rəvan layiqli qələbə qazandı
"Qarabağ"ın yarımmüdafiəçisi Cavid Tağıyev Topaz Premyer Liqasının 35-ci turu çərçivəsində "Rəvan"a qarşı keçirdikləri oyundan (1:2) sonra azerisport.az saytının suallarını cavablandırıb.
- Matçla bağlı nə deyə bilərsiniz?
- Çoxlu qol imkanımız oldu. Xüsusilə də buraxılan qoldan sonra. Penaltidən bir qol vura bildik. Amma ikinci topu rəqib qapısından keçirmək heç cür mümkün olmadı. Qırmızı vərəqə də oyunumuza az təsir göstərmədi. Azlıqda oynamaq çətin idi.
- Məğlubiyyətə səbəb "Qarabağ"ın ikinci heyətlə oynaması deyildi?
- Hansı heyətlə oynamağın fərqi yoxdur. "Qarabağ" elə komandadır ki, kimin meydana çıxmasından asılı olmayaraq, hər oyunda qələbəyə oynayır. Sadəcə, bu görüşdə bəxtimiz gətirmədi.
- Sizcə, hesab oyuna görə olmadı?
- "Rəvan" layiqli qələbə qazandı. Onlar mübarizə apardılar. Qələbə qazanıblarsa, deməli, bunu daha çox istəyirmişlər. Biz 11 oyun idi qələbə qazanırdıq. Amma bu dəfə uduzduq. Əlbəttə, təəssüflənirik. Futbolda belə hallar olur. Lakin ələ düşən şansları dəyərləndirsəydik, nəticə tam fərqli olmalıydı.
- "Rəvan" bu qələbə sayəsində son pilləni tərk etdi...
- Rəqibin bu oyuna çox ciddi hazırlaşdığı hiss olunurdu. Həm də onlarda motivasiya daha çox idi. Səhv etmirəmsə, son oyunlarını "Xəzər Lənkəran"a qarşı keçirəcəklər. Son pillənin taleyinə də məhz həmin oyunda aydınlıq gələcək.
- Qurban Qurbanov matçın gedişində çox əsəbi görünürdü, ikinci qoldan sonra hətta ehtiyat oyunçular skamyasını yumruqladı...
- Düzünü desəm, mən bunu görməmişəm. Çünki bütün diqqətim oyunda idi. Oyundan sonra əsəbi deyildi, həmişəki kimi, sakit idi. Səhvlərimizi bizə başa saldı ki, onları təkrar etməyək.
- Çoxdan idi əsas heyətdə oynamırdınız...
- Son dövrlər əvəzedici heyətdə oynasam da, əsas komanda ilə məşqlərimi davam etdirirəm. Bu matçda da öz mövqeyimdə oynamırdım. Buna baxmayaraq, komandama kömək etmək üçün əlimdən gələni etdim.
- "Rəvan"a məğlubiyyət komandanızın "Neftçi" ilə final oyununa daha yaxşı əhval-ruhiyyədə çıxmasına mane olmayacaq?
- Xeyr. Çünki qarşıda AZAL-la da oyun var. Ümid edirəm ki, bu oyunda qalib gəlib, "Neftçi" ilə görüşə yaxşı əhvalla hazırlaşacağıq.
- Mətbuatda sizin yayda "Qarabağ"ı tərk edəcəyiniz iddia olunur...
- Mən özüm də bunu elə ancaq mətbuatdan oxumuşam. "Qarabağ"la hələ daha bir illik müqaviləm var. Başqa klublardan təklif yoxdur. Rəhbərliklə də hələ heç bir söhbətimiz olmayıb. Amma şəxsən özüm komandada qalmağı çox istəyirəm.
