Bədavi Hüseynov: Ötənilki uğuru təkrarlamağı çox istəyirik
"Qarabağ"ın müdafiəçisi Bədavi Hüseynov Topaz Premyer Liqasının 35-ci turu çərçivəsində "Rəvan"a qarşı keçirəcəkləri oyun öncəsi azerisport.az saytının suallarını cavablandırıb.
- "Qarabağ" 11 oyundur qələbə qazanır. Yəqin ki, bu uğurlu seriya sizi çox sevindirir...
- (gülür) Kim qələbə qazanmaqdan yorula bilər ki? Qalib gəlmək həmişə xoşdur. Peşəkar futbolçularıq. Nə vaxta meydana çıxsaq, öz işimizi görməyə çalışırıq. Kubokda, çempionatda oynamağımıza fərq qoymuruq, hər oyunda qələbə qazanmaq istəyirik. 11 oyunluq qələbə seriyamız da göstərir ki, "Qarabağ" bundan ötrü əlindən gələni edir.
- "Qəbələ" üzərində qazandığınız son qələbənin əksəriyyət asanlıqla əldə olunduğunu qeyd edir...
- Bu, kənardan elə görünür. Amma əslində meydanda tam fərqli idi. "Qəbələ"nin yaxşı futbolçuları var. Demək olar ki, bizə hər oyunda qol vururdular. Amma bu dəfə onların bəzi oyunçuları meydanda yox idi. Bu da nəticəyə təsirsiz ötüşmədi.
- Bu turda sizi xal və xallara böyük ehtiyca duyan "Rəvan"la oyun gözləyir. Bu oyuna hansı motivasiya ilə çıxacaqsınız?
- Bizim üçün hər oyun vacibdir. Qarşıda kubokun final oyunu var. Belə bir matç öncəsi formadan düşmək olmaz. Final qarşılaşmasına yaxşı formada çıxmaq istəyirik. Buna görə də "Rəvan"la AZAL-a qalib gəlmək istəyirik.
- Ardıcıl ikinci mövsümdə qızıl dubl edə biləcəksiniz?
- Əlbəttə, ötənilki uğuru təkrarlamağı çox istəyirik. Amma finalda asan olmayacaq. "Neftçi" hazırda yüksəlişdədir. Onlar mövsümü titulla başa vurmaq üçün alışıb yanırlar. İnanıram ki, gərgin və maraqlı görüş olacaq.
- Öncədən finalın Gəncədə keçiriləcəyi müzakirə olunsa da, matç Tofiq Bəhramov adına respublika stadionuna təyin olundu. Bunun sizin üçün nəsə fərqi var?
- Xüsusi fərqi yoxdur. Amma mən Gəncədə oynamağımızı istərdim. Çünki bu arenada atmosfer tam fərqli olur. Gəncədəki dolu tribunalar qarşısında oynamaq xoşdur. Eyni zamanda onu da qeyd etmək lazımdır ki, bu stadionun qazonu yüksək səviyyəli oyun göstərməyə imkan vermir.
- U-17 millimizin AÇ-2016-nın final mərhələsindəki çıxışı barədə nə deyə bilərsiniz?
- Yığmamızın hər üç oyununa baxdım. Portuqaliya ilə oyunu stadiondan izləyirdim. Həmin oyundan sonra hamı deyirdi ki, bu uşaqlarla gələcəyimiz yoxdur, zəif komandayıq. Amma uşaqlar Belçika və Şotlandiya ilə oyunlarda əsl potensiallarını göstərdilər.
- Qarşıda millimizi Avstriya toplanışı gözləyir ki, həmin hazırlıq prosesindəki rəqiblərdən biri də Makedoniyadır. Bu ölkənin ən ünlü futbolçusu Qoran Pandev saytımıza müsahibəsində Azərbaycanın güclü yığmasının olduğunu bildirib. Bəs siz Makedoniya yığmasına necə qiymət verə bilərsiniz?
- Biz də Makedoniya yığmasına hörmətlə yanaşırıq. Səviyyəli futbolçuları var. Ona görə də bu rəqibə ciddi yanaşırıq. Makedoniya yığmasına qalib gəlməyi çox isrəyirik. DÇ-nin seçmə mərhələ oyunlarına tam hazır olmaq üçün yoxlama görüşlərində qələbə qazanmağımız lazımdır.
