Laşa Kasradze: Üçüncü yeri tutmaq İnter kimi, mənim üçün də önəmlidir
"İnter"in müdafiəçisi Laşa Kasradze Topaz Premyer Liqasının 35-ci turu çərçivəsində "Neftçi"yə qarşı keçirəcəkləri oyun öncəsi azerisport.az saytının suallarını cavablandırıb.
- Qarşıdakı matçdan nə gözləyirsiniz?
- Bizim üçün vacib oyundur. Meydana çıxıb, ən yaxşı futbolumuzu göstərməyə çalışacağıq. Üçüncü yeri tutmaq istəyiriksə, derbidən maksimum xalla ayrılmağımız vacibdir.
- Azərbaycan çempionatının bürünc medallarını qazanmaq sizin üçün nə dərəcədə önəmlidir?
- Bu, komandam üçün vacibdirsə, deməli, mənim üçün də önəmlidir.
- Üçüncü yer uğrundakı əsas rəqibləriniz "Kəpəz"lə "Qəbələ"dir. Onlardan hansını özünüz üçün daha təhlükəli hesab edirsiniz?
- Gəncə klubu bizə daha yaxındır. Son turda onlar öz aralarında oyun keçirəcəklər. Görək, necə oynayacaqlar. Ümid edirəm ki, qalan oyunlarımızda qalib gəlsək, həmin matç bizim üçün heç bir əhəmiyyət daşımayacaq.
- "Neftçi" hazırda yüksəlişdədir. Onlara qalib gəlmək çətin olmayacaq?
- Bu, "İnter" üçün heç nəyi dəyişmir. Hətta rəqibin hazırda yeddinci pillədə qərarlaşması da. Onlar həmişə təhlükəli rəqib olublar. İstənilən rəqibə qalib gələ bilərlər. Bizə də asan olmayacaq. Amma biz meydana qələbə üçün çıxacağıq.
- Bir müdafiəçi kimi "Neftçi"nin hücum xəttini necə xarakterizə edərdiniz?
- Bu komanda həmişə təhlükəli hücumlar qurur.
- Rəqibin heyətində kimi fərqləndirə bilərsiniz?
- Altı nömrəli braziliyalını (Ayltonu nəzərdə tutur - red.).
- Mövsümün sonunda klubunuzla müqavilənizin müddəti başa çatacaq. Onu yeniləməyi düşünürsünüz, ya başqa planlarınız var?
- Hələ bilmirəm. Bu barədə yalnız mövsüm başa çatandan sonra nəsə demək olar. Hələ bu haqda danışmaq istəmirəm.
