Bəhmən Həsənov: Qarabağ ilə oyunda bizə xal və xallar lazımdır
"Rəvan"ın baş məşqçisi Bəhmən Həsənov Topaz Premyer Liqasının 35-ci turu çərçivəsində "Qarabağ"a qarşı keçiriləcək oyun öncəsi fikirlərini bölüşüb. Azerisport.az saytına açıqlamasında o, bunları söyləyib:
"Qarabağ" əla komandadır. Yeri gəlmişkən, onları çempionluq münasibətilə təbrik edirəm. Rəqibimizin çempionatdakı hədəfinə çatdığını nəzərə alsaq, motivasiya bizdə daha çox olmalıdır. Bizə xal və xallar lazımdır. Çempiondan xal almağın nə dərəcədə alınacağını oyun göstərəcək. Yəqin ki, rəqibimiz meydana normal heyət buraxacaq, reytinqini aşağı salmaq istəməyəcək. Digər tərəfdən onları qarşıda Azərbaycan kubokunun final oyunu gözləyir. Belə vacib oyun öncəsi zədə almağı heç bir futbolçu istəməz. Üstəlik, süni örtüklü meydanda oynayacağıq. Amma "Qarabağ" meydana hətta ehtiyat heyətini də buraxsa, orada güclü futbolçuların yer alacağı şübhəsizdir".
