Qara Qarayev: Ümid edirəm ki, kuboku da biz qazanacağıq

"Qarabağ"ın yarımmüdafiəçisi Qara Qarayevin azerisport.az saytına müsahibəsi

- Son turda "Qəbələ" üzərində qazandığınız qələbəni (2:0) necə şərh edərdiniz?
- Ev oyununda elə də böyük çətinlik çəkmədik. Öz oyunumuzu itirməməyə çalışırıq. Şadam ki, qələbə qazandıq. "Qəbələ" çətin komandadır. Onlar da çalışdılar, amma qələbə bizim oldu. Baş məşqçini və fanatlarımızı təbrik edirəm.

- Erkən çempionluqdan sonra oyunlara köklənmək çətin deyil?
- Qarşıda daha bir hədəfimiz var - kuboku qazanmaq. Həmin oyunu düşünərək, hər bir matça böyük motivasiya ilə çıxırıq. Çempionatın bütün oyunları finala hazırlıq planıdır. Həm də qarşıda bizi yığma komandanın təlim-məşq toplanışı gözləyir. Həmin oyunlara hazır olmaq üçün çempionatda da yaxşı çıxış etməliyik.

- Bir müddət əvvəl qeyri-sabit çıxış edirdiniz. Nə baş vermişdi?
- Heç bir problem yox idi. Sadəcə, daha çox məşq etmək lazım idi. Qurban Qurbanovla meydandan kənarda dost kimiyik, o, bizə çox şeyi izah edir. Çox çalışdım və əvvəlki formamı bərpa etdim.

- Kubokun finalındakı rəqibiniz "Neftçi"nin son dövrlər uğurlu çıxış etməsi sizin üçün problem deyil?
- "Neftçi" elə komandadır ki, istənilən rəqibə qalib gələ bilər. Bu komandanın futbolçuları meydana qələbə qazanmaq arzusu ilə çıxırlar. Bu üzdən də onlara qarşı oynamaq çətin olur. Amma kubokun finalında oynamaq təcrübəmiz var. Ümid edirəm ki, daha bir mükafat qazana biləcəyik.

- Nə vaxtsa belə bir fikir var idi - futbolu 22 oyunçu oynayır, amma almanlar qələbə qazanır. İndi isə Azərbaycanda deyirlər ki, hamı oynayır, "Qarabağ" qalib gəlir...
- (gülür) Mən belə deməzdim. "Qarabağ" barədə belə fikirlərin səsləndirilməsini də istəməzdim. Biz də "Sumqayıt"a, AZAL-a uduzmuşuq. Sadəcə, hər oyuna daha böyük motivasiya, qələbə istəyi ilə çıxırıq.

- "Əlincə Arena" necədir?
- Əladır. "İnter"lə kubok oyununda iştirak etməmişdim. Amma "Qəbələ" ilə görüşdə oynadım. Xoşuma gəldi.