Prosineçki Ufuk Budağı da yada saldı

Azərbaycan yığmasının baş məşqçisi Robert Prosineçki millimizin sabiq müdafiəçisi Ufuk Budağa dəvət göndərib. Azerisport.az xəbər verir ki, uzun müddət idi yığmamıza dəvət almayan Türkiyənin "Qaziantep BB" klubunun üzvü ilk dəfə xorvatiyalı mütəxəssisin siyahısında yer alıb.

Ufuk millimizin qarşıdakı Avstriya toplanışında iştirak edəcək. Vyanadakı hazırlıq prosesi çərçivəsində komandamız mayın 23-dən iyunun 4-dək üç yoxlama matçına çıxacaq. Rəqiblərimiz isə Andorra, Makedoniya və Kanadadır.

Qeyd edək ki, 25 yaşlı Budak cari mövsümdə Türkiyə PTT 1-ci liqasında 26 oyuna çıxıb, iki qol vurub. Onun klubu ilə müqaviləsinin müddəti may ayının sonunda başa çatacaq. Türkiyə mətbuatının iddiasına görə, futbolçu ilə Super Liqa klubları da maraqlanır.