Fərid Nəbiyev: AÇ bizim üçün böyük təcrübə oldu
Azərbaycanın 17 yaşadək futbolçulardan ibarət yığma komandasının yarımmüdafiəçisi Fərid Nəbiyev AÇ-2016-nın qrup mərhələsi çərçivəsində Şotlandiya üzərində qazandıqları qələbədən (1:0) sonra azerisport.az saytının suallarını cavablandırıb:
- Şotlandlarla oyun barədə nə deyə bilərsiniz?
- Portuqaliyaya ilk oyunda böyük hesabla uduzsaq da, komandamız "sınmadı". Biz söz verdik ki, turniri layiqli şəkildə başa vuracağıq. İlk oyun da elə bitməməli idi. Fikrimcə, Belçika və Şotlandiya ilə oyunlarda azarkeşlərimizi sevindirməyi bacardıq.
- Oyundan sonra paltardəyişmə otağına AFFA prezidenti Rövnəq Abdullayevlə gənclər və idman naziri Azad Rəhimov gəldi. Onlar sizə nə söylədilər?
- Qələbə münasibətilə təbrik etdilər. Bildirdilər ki, turnirdəki ilk oyundan sonrakı vəziyyətinizi başa düşürük. Həmçinin uğurlu nəticəyə görə bizə təşəkkür etdilər.
- Komandanız 4 xal toplasa da, qrudan çıxa bilmədi. Bu, sizi məyus edir?
- Növbəti mərhələyə vəsiqə qazanmaq istərdik. Amma bu nəticə də bizim üçün bir uğurdur. Çünki Azərbaycan yığması ilk dəfə belə böyük turnirdə iştirak edirdi. Bizim üçün böyük təcrübə oldu.
- Bəxtinizin gətirmədiyini demək olar?
- Tam razıyam. Portuqaliya yığmasının əvəzində istənilən başqa komanda olsaydı, biz bu qrupdan asanlıqla çıxardıq.
- Şotlandiyaya vurduğunuz qol möhtəşəm alındı...
- Öz gücümə inanırdım. İnanırdım ki, zərbəm alınsa, qol olacaq. Həmin vəziyyətdə başqa çıxış yolu görmədim.
- Bu qol turnirin ən yaxşısı da ola bilər...
- Bu, artıq mənim üçün o qədər də vacib deyil. Əsas komandamızın belə bir turnirdə ilk qələbəsini qazanmasıdır.
