Təbriz Həsənov: Millidə ən çox hücum xəttindən narazı qaldım

Azərbaycanın 17 yaşadək futbolçulardan ibarət yığma komandasının baş məşqçisi Təbriz Həsənov AÇ-2016-nın qrup mərhələsi çərçivəsində Şotlandiyaya qalib gəldikləri oyunu (1:0) şərh edib. Azerisport.az xəbər verir ki, o, öncə bunları söyləyib:

"Oyun bizim üstünlüyümüzlə keçdi. Qalib gəldiyimizə görə sevinirəm. Təəssüf ki, qrupdan çıxa bilmədik. Uşaqlara təşəkkür edirəm. Onlar bu gün mübarizə apardılar. İlk oyundakı böyük hesablı məğlubiyyətdən sonra toparlana bildilər".

"Hamınız oyunlara baxırsız. Bu gün Şotlandiya millisinin oyunçularının sürətini gördünüz. Onlarda məktəb var. Bizim oyunçulardan Murad Mahmudov Almaniyada çıxış edir. Onun sürəti göz qabağındadı. Məncə, uşaq futbolunda sürət cəhətdən problem var".

"İlk oyunda Olimpiya stadionunda böyük hesabla uduzmağımıza gəlincə, mənim əlimdə olsaydı, o stadionda oynamağa icazə verməzdim. Keçən oyunda Murad Mahmudovun epizodu qol olsaydı, indi bəlkə də biz gələn oyunlara hazırlaşırdıq".

Milliləşdirilmiş oyunçulardan danışan baş məşqçi bunları vurğulayıb: "Doğukan bu gün zəif oynadı. Ancaq onlar bir neçə ildi bizim komandadadılar. Mənim ən narazı qaldığım mövqe hücum xəttidi. O ki qaldı yeni gələnlərə, bizim müdafiəçilər zədəli idi. Buna görə yeni oyunçular cəlb etməli idik".

Həsənov həmçinin Murad Mahmudovla Almaniyanın "Bavariya" klubunun maraqlandığı barədə xəbərlərə də münasibət bildirib: "Bildiyim qədərilə onlar bizim texniki direktor Bernard Lippertlə əlaqə saxlayıblar. Bu barədə mən də eşitmişəm".