Fikrət Hüseynov: Avroliqada bu heyətlə bizə çətin olar
AZAL-ın vitse-prezidenti Fikrət Hüseynov Topaz Premyer Liqasının 34-cü turu çərçivəsində qarşılaşdıqları "Zirə" ilə oyun öncəsi fikirlərini bölüşüb. Azerisport.az saytına açıqlamasında o, bunları söyləyib:
"Anca qələbə gözləyirik. Bildiyiniz kimi, bu mövsüm öz meydanımızda uduzmamışıq. Doğma meydandakı son matçımız isə "Zirə"yə qarşıdır. Fikrimcə, bu görüşdə də hər şey bizim üçün yaxşı alınacaq və qələbə qazanacağıq".
Hüseynov yayda komandanın heyətindəki mümkün dəyişikliklər barədə bunları bildirib: "Bizim heyətlə bağlı müəyyən planlarımız var. Çünki indiki heyətlə Avropa Liqasında çıxış etmək çətin olacaq. Amma Avroliqaya vəsiqəni məhz bu heyətin qazandığını nəzərə alsaq, 80-85 faiz komandada qalacaq. Yayda baş məşqçi Tərlan Əhmədovla da müqavilənin müddəti başa çatır. Amma biz onunla da əməkdaşlığı davam etdirəcəyik".
