Yaşar Vahabzadə: Millimiz Şotlandiyaya qalib gələ bilər
Azərbaycanın U-21 yığmasının baş məşqçisi Yaşar Vahabzadənin azerisport.az saytına müsahibəsi
- Yəqin ki, Bakıda təşkil olunan 17 yaşlıların Avropa çempionatını diqqətlə izləyirsiniz. Azərbaycan millisinin çıxışı barədə nə deyərdiniz?
- İlk növbədə Portuqaliya ilə oyunun nəticəsi gözə sataşır. 0:5 hesablı məğlubiyyətin bir neçə səbəbi var. Məsələn, komanda həyəcanı boğa bilmədi. Stadiondakı atmosfer onlara mənfi təsir göstərdi. Bundan əlavə, onlar rəqibin statusundan da qorxdular. Amma belə bir məğlubiyyətdən sonra toparlanıb, Belçika ilə heç-heçə etmələrini xüsusi qeyd etmək istərdim. İkinci oyunda futbolçularımız daha yaxşı təsir bağışladı. İnamlı görünürdülər. Qələbə də qazana bilərdilər.
- Bəs Şotlandiya ilə oyundan nə gözləyirsiniz?
- Belçikaya qarşı sərgilədikləri oyunu göstərsələr, müdafiədə diqqətli olsalar, hücumda səmərəli çıxış etsələr, qələbə qazana bilərlər. Amma təəssüf ki, qrupdan çıxmaq baxımından hər şey öz əlimizdə deyil. Portuqaliyanın Belçika üzərində böyük hesablı qələbəsini arzulamaq məcburiyyətindəyik.
- Bu komandada gələcəkdə U-21-də görmək istədiyiniz uşaqlar var?
- Bu uşaqları diqqətlə izləyirik. Ad çəkmək istəmirəm. Amma 3-4 futbolçu var ki, diqqət mərkəzimdədir.
- U-21 yığmamızın yaxın zamanda toplanışı nəzərdə tutulubmu?
- Bəli. Mayın 25-də Sloveniyaya yollanacağıq. İyunun 5-dək orada olacağıq. Orada üç yoxlama oyunu da keçirməliyik.
- Azərbaycan Kubokunun finalında hansı komandanı daha şanslı hesab edirsiniz?
- Demək çətindir. Kubokda sürpriz ola bilər. "Qarabağ" favoritdir. Amma bu, "Neftçi"nin şansının olmadığı anlamına gəlmir. Maraqlı oyun olacaq.
- Premyer Liqanın cari mövsümü sizin üçün daha çox nə ilə yadda qaldı?
- İlk növbədə "Kəpəz"in elitadakı iştirakı ilə. Onlar gec toplandılar. Komanda mövsümün gedişində formalaşdı. Buna baxmayaraq, onlar avrokuboklara vəsiqə qazana bildilər. "Zirə"ni də qeyd etmək olar. Amma "Qəbələ" tam fərqli olaraq, məyus etdi. Onlardan gözləntilər çox idi.
