Zaur Svanadze: Klubda bu münaqişədən heç kimin xəbəri yoxdur

"İnter"in baş məşqçisi Zaur Svanadze Topaz Premyer Liqasının 34-cü turu çərçivəsində qarşılaşacaqları "Xəzər Lənkəran"la oyun öncəsi fikirlərini bölüşüb. Azerisport.z saytına açıqlamasında o, bunları söyləyib:

"Xəzər Lənkəran"da baş məşqçi dəyişikliyi olub. Adətən, belə olanda komanda daha yaxşı oynamağa başlayır. Hər kəs özünü yaxşı tərəfdən göstərmək istəyir. Bu da təbii ki, bizim işimizi ağırlaşdıracaq. Amma biz maksimum nəticəyə imza atmaq istəyirik. Çünki üçüncü yer uğrunda mübarizə aparırıq".

Gürcüstanlı mütəxəssis qapıçı Kamran Ağayevin ötən gecə düşərgədən qaçması və getdiyi restoranların birində münaqişəyə səbəb olması barədə mətbuatda yayılan xəbərlərə də münasibət bildirib: "Mən bu barədə heç nə bilmirəm. Klubda da bundan xəbəri olan yoxdur. Biz heç ümumiyyətlə hansı toplanışdan söhbət getdiyini bilmirik. Amma məsələni mütləq aydınlaşdıracağıq. Doğrudan da belə hal olubsa, müvafiq qərarlar qəbul edəcəyik".