Rəhman Hacıyev: Neftçi indi daha böyük istəklə oynayır
"Neftçi"nin yarımmüdafiəçisi Rəhman Hacıyev Topaz Premyer Liqasının 34-cü turu çərçivəsində "Kəpəz"ə qarşı keçirəcəkləri oyun öncəsi azerisport.az saytının suallarını cavablandırıb.
- "Kəpəz"lə oyunda hansı nəticəyə ümid edirsiniz?
- Həmişə olduğu kimi, nəticəyə oynayacağıq. Turnir cədvəlində irəliləmək lazımdır. Bunun üçün də 3 xal qazanmalıyıq.
- Yəqin ki, son turda AZAL üzərində qələbə sayəsində komandanızda atmosfer əladır...
- Həmin oyunda mən sanki öz evimdə oynayırdım. Çünki Masazırda yaşayıram. Oyun bizim üçün uğurlu alındı. Şadam ki, qələbə qazandıq. AZAL-a cari mövsümdə həmin matça qədər qalib gələ bilməmişdik. Avropa Liqasına vəsiqə qazanmaq istəyiriksə, AZAL-a qabaqlamağımız lazımdır. Bütün ümidimizi kubokun finalına bağlaya bilmərik.
- Turnir cədvəlindəki mövqeyinizdən razısınız?
- Xeyr. Klubumuz layiq olduğu mövqedə deyil. Biz daha üst pillələrdə qərarlaşmalı idik.
- "Neftçi" əvvəlki turlarda niyə belə oyun sərgiləmirdi?
- Biz oyun sxemimizi dəyişdik və daha yaxşı oynamağa başladıq. İndi uşaqlarda da istək çoxdur, çalışırlar.
- Təsadüfən, klub rəhbərliyi matç ərəfəsində sizə mükafat söz vermir?
- Əlbəttə, mükafatlar olur. Klub rəhbərliyi bizi həm yaxşı, həm də pis günümüzdə dəstəkləyir.
- AZAL-la oyunu millinin baş məşqçisi Robert Prosineçkinin də izlədiyini bilirsiniz?
- Bunu oyundan sonra eşitdim.
- Ondan dəvət gözləyirsiniz?
- Buna baş məşqçi özü qərar verir. Əlbəttə, mən də yığmanın formasını geyinməyi, komandaya fayda verməyi arzulayıram.
- Yığmaya hazır olduğunuzu hesab edirsiniz?
- Bəli.
- Sizə elə gəlmir ki, "Neftçi"nin Avroliqaya vəsiqə qazanması üçün "Qarabağ"a kubokun finalında qalib gəlməsi yetərlidir?
- Əlbəttə, bəs edir. Biz də bunu başa düşürük. Amma niyə çempionatda da AZAL-ı qabaqlamaqla bunu təmin etməyək? Elə olan halda kubokun finalında vəsiqə barədə yox, yalnız bu oyunda qalib gəlməyi düşünərik.
- "Neftçi" ötən il heyətində daha çox legioner olduğu halda, "Qarabağ"a finalda uduzmuşdu. Bu dəfə isə daha çox gənclərdən ibarət heyətlə oynayacaqsınız. Nəyə ümid edirsiniz?
- "Neftçi"də özünə, "Qarabağ"a qalib gəlməyə inam var. Bizim bu qələbəyə ethiyacımız var.
