Mətin Gülər: Biz qəbələni əldən verdik
17 yaşadək futbolçulardan ibarət Azərbaycan yığmasının yarımmüdafiəçisi Mətin Gülər AÇ-2016-nın qrup mərhələsi çərçivəsində Belçikaya qarşı keçirilmiş oyundan (1:1) sonra azerisport.az saytının suallarını cavablandırıb.
- Matçla bağlı nə deyə bilərsiniz?
- Matça yaxşı başlamışdıq. Bərabər mübarizə gedirdi. Portuqaliya ilə oyundakı məğlubiyyəti unuda bilmişdik. Bu görüşdə hər şey fərqli alındı. Ümid edirəm ki, Şotlandiya ilə görüşdə tamam fərqli olacaq. Son oyunda qazanacağımız qələbə və Portuqaliyanın Belçikanı böyük hesabla məğlub etməsi bizi növbəti mərhələyə çıxara bilər.
- Bəs qısa müddət ərzində necə toparlana bildiniz?
- Öz aramızda söhbətləşdik. Uşaqlar yaxşı başa düşürdülər ki, öz meydanımızda belə oynamaq olmaz. Azərbaycan xalqı da buna layiq deyil. Fikrimcə, tədricən ümidləri doğrulduruq. Amma bu görüşdə biz qələbəni əldən verdik. Bu, bir qədər məyusluq yaradır.
- Matçın gedişində mövqeyinizi dəyişib, müdafiədə oynamağa başladınız. Nə baş verdi?
- Bu, baş məşqçinin qərarı idi. Komanda yoldaşımız zədələndi və baş məşqçi qərara gəldi ki, mən müdafiədə daha faydalı ola bilərəm. Komandamıza kömək etdiyim üçün şadam.
- Hakim ikinci hissədə rəqibin cərimə meydançasında futbolçumuza qarşı kobudluğun penalti olmadığını bildirdi. Siz həmin epizodla bağlı nə düşünürsünüz?
- Həmin epizodu görürdüm. Hakim səhvə yol verdi. Orada təmiz penalti var idi. Belçikalıların qapısına birinci hissədə də penalti təyin olunmalı idi. Bir görüşdə iki penaltinin təyin olunmaması anlaşılmazdır. Hakim daha çox rəqibin lehinə fit çalırdı. Bu da bizi az məyus etmədi.
- Deməli, hakim qərarları nəticəyə təsirini göstərdi?
- Birmənalı şəkildə elədir. Biz qalib gəlməliydik.
- Razısınız ki, Portuqaliya ilə oyunda komandamız Bakı Olimpiya stadionunda oynamağın həyəcanını boğa bilmədi?
- O oyunda hər şey fərqli idi. Orada emosiyaları boğmaq, oyuna köklənmək çətin idi. "Bakcell Arena"da isə fərqli alındı. Burada oynamaq daha xoş idi.
- Türkiyə mətbuatı Azərbaycanın U-17-də çıxış edən futbolçuların gələcəkdə qardaş ölkə millisini seçəcəyini iddia edib. Siz qərarınızı müəyyənləşdirmisiniz?
- Hələ heç bir qərar qəbul etməmişəm. Hazırda bu barədə danışmaq tezdir. Heç istəyim də yoxdur.
