Tahir Musalov: Millidə oynamaq şərəfdir, amma necə olacağını zaman göstərəcək
Rusiyanın "Anji" klubunun və Azərbaycanın U-19 yığmasının hücumçusu Tahir Musalovun azerisport.az saytına müsahibəsi
- Azərbaycan yığmasında oynamaq perspektivi necə yarandı?
- Bir müddət əvvəl mənə AFFA-dan təklif gəldi. Hələ rəsmi oyunlarda iştirak etməmişəm. Sadəcə, toplanışda olmuşam, yoxlama oyunlarına çıxmışam.
- Amma sonradan sizə dəvət göndərilmədi. Bu, sizin özünüzü yaxşı tərəfdən göstərə bilməməyinizdən qaynaqlanır, ya başqa səbəb var?
- Özümü yaxşı tərəfdən göstərə bilməsəydim, o zaman mənə niyə Azərbaycan vətəndaşlığı təklif olunurdu?
- Belə çıxır ki, siz Rusiyada legioner sayılmırsınız. Amma bəzi mənbələrdə artıq Azərbaycan vətəndaşı kimi göstərilirsiniz...
- Xeyr. Heç vaxt Azərbaycan vətəndaşlığım olmayıb. Görünür, həmin mənbələrdə səhv göstərilib. İkili vətəndaşlıq həmişə futbolçunu çətin vəziyyətə salır.
- Siz U-19-a dəvət alanda komandaya Vəli Qasımov rəhbərlik edirdi. İndi "Neftçi"ni çalışdıran bu mütəxəssisdən dəvət almamısınız?
- Xeyr. Düzünü desəm, heç Qasımovla ümumiyyətlə söhbətləşməmişəm.
- Bəs onunla çalışmaq necə idi?
- Bütövlükdə, belə bir mütəxəssisin rəhbərliyi altında çalışmaq mənim üçün çox xoş idi. Amma mən hələ Azərbaycanın ən güclü futbolçularından biri olmuş belə bir şəxsin işinə qiymət verəcək səviyyəyə çatmamışam.
- Azərbaycanla hansısa bağlılığınız varmı?
- Bəli, əlbəttə! Mənim uzaq qohumlarım Zaqatala və Balakəndə yaşayırlar. Onlarla münasibətimiz də var.
- Deməli, siz Azərbaycanda problemsiz oynaya bilərsiniz...
- Milli komandada oynamaq hər bir futbolçu üçün şərəfdir. Amma hazırda bu barədə heç bir dəqiq fikir söyləyə bilmərəm. Zaman göstərəcək.
- Azərbaycan klublarında oynamaq istəyərsiniz?
- Çempionatı daim izləyirəm. Əsasən nəticələrlə maraqlanıram. Hansı ki, həmin klublarda dostlarım çıxış edir. Onların necə oynadığı maraqlıdır.
- Hansı Azərbaycan klublarını tanıyırsınız?
- Azərbaycanda o qədər çox klub yoxdur ki, onları tanımayasan (gülür).
- "Anji"də işləriniz necə gedir?
- Şübhəsiz ki, işlərimiz ürəkaçan deyil. Bizə xallar qazanmaq lazımdır. Mövsüm demək olar ki, sona çatmaq üzrədir. Vəziyyəti düzəltmək üçün mümkün qədər çox xal toplamalıyıq.
