Roman Qriqorçuk: Hər iki oyunda imkanlardan istifadə edə bilmədik

Azərbaycan kubokunun yarımfinal mərhələsinin “Qəbələ” - “Neftçi” cavab oyunundan (1:1, pen.3:4) sonra “qırmızı-qaralar”ın baş məşqçisi Roman Qriqorçukun mətbuat konfransı keçirilib. Azerisport.az sizi ukraynalı mütəxəssisin fikirləri ilə tanış edir:

“Futbolçularıma təşəkkür edirəm. Onları qınamaq istəmirəm. Belə vəziyyətdə güclü olub, baş verənləri yaşamaq lazımdır. Artıq qarşıdakı çempionat matçını da düşünməliyik. Bəzi oyunların təhlilindən sonra futbolçularla sərt, tənqidi söhbət etmişik. Amma bu matça görə onlara irad bildirmək olmaz. Futbolçularım bütün bacarıqlarını ortaya qoydular. Lakin onlara çox öyrənmək lazımdır. Onlara dəstək olmağa çalışıram. Finala yüksələ bilməməyimizin səbəblərindən biri odur ki, həm ilk, həm cavab oyununda qol imkanlarından istifadə edə bilmədik. Hücum quruculuğunda ideala yaxınıq, amma sonluğu alınmır. Bütün oyun boyu aşkar üstünlüyə malik olduq. Əlbəttə, müəyyən səhvlər, istifadə olunmayan qol imkanları da gördük. Penaltilər seriyasında zərbə endirən oyunçuları onların istəyinə əsasən seçirəm. Bu gün də belə oldu. Seçim barədə düşünüb, təhlil etmək istəmirəm. Bu deyil, digər futbolçunun zərbə vurmasının necə nəticələnəcəyini bilmək olmaz. Bu matçda uduzub, kubok yarışından kənarda qaldıq. Peşəkar kimi yanaşsaq, qələbənin də, məğlubiyyətin də olduğu idman həyatını yaşamalıyıq”.