Vaqif Cavadov: Sumqayıt yaxşı təklif irəli sürsə, qalacağam
"Sumqayıt"ın hücumçusu Vaqif Cavadov Topaz Premyer Liqasının 32-ci turu çərçivəsində "İnter"ə qarşı keçirdikləri oyundan (2:2) sonra azerisport.az saytının suallarını cavablandırıb:
- "İnter"lə oyun barədə nə deyə bilərsiniz?
- Mövsümdə belə oyunlar az olur. Çox gərgin oyun oldu. Təəssüf ki, bu qədər qol vəziyyəti yaratdığımız halda, sonda heç-heçə etdik. Üç penaltidən demək olar ki, heç biri dəqiq yerinə yetirilmədi. Penaltidən başqa digər qol vəziyyətlərimizi da boşa verdik. Bütövlükdə, yaxşı oynadıq.
- "Sumqayıt"dakı ilk qolunuzu vurdunuz. Amma penaltini dəyərləndirə bilmədiniz..
- Penaltini vura bilməmək mənim səhvim idi. İkinci qolu vurmağı çox istəyirdim. Amma şəxsi göstəricilərim məni heç vaxt narahat etməyib. Mənim üçün əsas komandamın uğur qazanmasıdır.
- "Kəpəz"ə məğlubiyyətdən (2:3) sonra baş məşqçi Samir Abasov futbolçuların əksərinin yayda komandadan göndəriləcəyini qeyd etmişdi. Bunu necə qarşıladınız?
- Tamamilə normal. Onun oyuna öz baxışı var. Şübhəsiz ki, istədiklərini görə bilmirsə, dəyişiklik lazımdır. Amma "İnter"lə oyun göstərdi ki, komandamız yaxşı oynaya bilir. Uşaqlar özlərini göstərmək istəyirlər.
- Özünüzü növbəti mövsümdə də "Sumqayıt"da görürsünüz?
- Qışda "Sumqayıt"a ailə vəziyyətimlə əlaqədar keçdim. Burada həm də öz oyunumu yaxşılaşdırmaq istəyirdim. "Sumqayıt"ın rəhbərliyi, məşqçilər korpusu ilə gözəl münasibətim var. Hər şey klubdan asılıdır.
- Nə mənada?
- Klub öz iddiasını artıracaqsa, onlardan yaxşı təklif alacağamsa, niyə də burada qalmayım? Qarşısına böyük hədəflər qoyan komandada oynamaq istəyirəm. Hələ qalacağımı və ya gedəcəyimi dəqiq bilmirəm.
- "Sumqayıt"a gələndən sonra çox tənqid olunurdunuz. Amma son dövrlər oyununuz yaxşılaşıb...
- Tənqidi həmişə normal qəbul etmişəm. Heç vaxt tənqidlərə cavab verməmişəm. Mən öz işimi görürəm. Futbolu sevirəm.
- Robert Prosineçkinin sizi Avstriya toplanışına çağıracağını gözləyirsiniz?
- Buna baş məşqçi qərar verəcək. Hamıya yaxşı məlumdur ki, milli komandada nə qədər oyun keçirmişəm, kömək etmişəm. Yenə lazım gəlsə, millidə oynamağa hazıram.
- "Qarabağ"ın ardıcıl üçüncü çempionluğunu necə qarşıladınız?
- Bu, normaldır, çünki onlar bütün rəqiblərindən güclü idi. Növbəti layiqli çempionluğu rəsmiləşdirdilər. Uşaqları, klub rəhbərliyini təbrik edirəm. Ümid edirəm ki, növbəti mövsümdə Çempionlar Liqasının qrup mərhələsində çıxış edərlər.
- Sizə elə gəlmir ki, erkən çempionluq milli çempionatımıza mənfi təsir göstərir?
- Əlbəttə, bu, çempionata marağı öldürür. Amma "Qarabağ" bütün keyfiyyətlərdə rəqibini üstələyirsə, nə etmək olar? 2-3 mövsüm öncə çempionat daha güclü idi.
