Bədavi Hüseynov: ÇL-in qrup mərhələsinə vəsiqə qazanmağa çalışacağıq
"Qarabağ"ın müdafiəçisi Bədavi Hüseynov Topaz Premyer Liqasının 32-ci turu çərçivəsində "Zirə"yə qarşı keçirdikləri oyundan (2:0) sonra azerisport.az saytının suallarını cavablandırıb.
- Çempionluq matçınızla bağlı nə deyə bilərsiniz?
- Ağır oyun alındı. Rəqib də sıradan komanda deyildi. Premyer Liqanın ikincisidir. Onlar təhlükəli hücumlar qururlar. Ön xəttdə isə hazırda çempionatın ən yaxşı bombardiri olan Nelson Bonilya oynayırdı. Onu neytrallaşdırmaqla qələbə qazanmağa nail olduq. Qələbə qazanmaqla çempionluğu rəsmiləşdirəcəyimizi bilirdik. Elə də oldu.
- Son çempionluqları müqayisə etsək, hansı daha çətin alındı?
- Hər il daha çətin olur. Çünki səviyyəni qorumaq lazım gəlir. Hər mövsüm rəqiblər bizə qarşı daha böyük istəklə mübarizə aparırlar. Ola bilər ki, bu mövsüm böhranla əlaqədar rəqabət elə də ciddi deyildi. Amma ayrı-ayrı oyunlar üzrə götürsək, komandaların köklənməsində ciddi bir fərq yoxdur.
- Amma əvvəlkilərə nisbətən bu mövsümün asan keçdiyini demək olar?
- Belə müqayisə etsək, demək olar. Bu, daha çox baş məşqçimizin əməyidir. O, çox böyük iş görür. Rəhbərlik də bizi tam dəstəkləyir. Nə lazımdırsa, edirlər. Bu, daha çox onların uğurudur.
- Oyundan sonra çempionluğu elə də böyük coşqu ilə qeyd etmədiniz...
- (gülür) Siz paltardəyişmə otağında olmadınız. Orada daha çox sevindik. Ola bilsin ki, artıq güc itirmək istəmirdik. Çünki hələ mövsüm başa çatmayıb.
- Qarşıdakı oyunlar üçün hədəfiniz nədi?
- Heç bir halda arxayınlaşmaq olmaz. Çünki kubok oyununa da ciddi hazırlaşmaq lazımdır. Bizim hədəfimiz ötən mövsüm əldə etdiyimiz uğurları təkrarlamaqdır. Yəqin ki, heyətdə də rotasiya olacaq.
- Komandanın avrokuboklardakı hədəfi nə olacaq: Çempionlar Liqasının qrup mərhələsinə vəsiqə qazanmaq?
- Hamı bizdən bunu gözləyirik. Bunu gözəl anlayırıq. Amma bilirsiniz ki, orada asan rəqib olmur. Ciddi hazırlaşmaq lazımdır. Hər halda ÇL-in qrup mərhələsinə vəsiqə qazanmaq üçün əlimizdən gələni edəcəyik.
