Qara Qarayev: Çempionluğu əsgərlərimizə həsr edirəm
"Qarabağ"ın yarımmüdafiəçisi Qara Qarayev Topaz Premyer Liqasının 32-ci turu çərçivəsində "Zirə"yə qarşı keçirdikləri oyundan (2:0) sonra jurnalistlərin suallarını cavablandırıb. Azerisport.az xəbər verir ki, o, 2:0 hesabıyla qalib gəldikləri oyunu belə şərh edib:
- Bu, bizim uğurumuzdur. Evdə divardan asmağa yeni nəsə olacaq. Fikrimcə, bu çempionluğa hər birimiz layiqik. Amma bu oyun tempini və nəticələrimizi saxlamalıyıq.
- Ardıcıl ikinci ildir ki, çempionluğun taleyini səfər matçında həll edirsiniz...
- Düzdür, çempionluğu səfərdə rəsmiləşdirdik. Amma mövsümün son oyununu evdə keçirəcəyik. Elə mükafatımızı da həmin oyundan sonra, doğma azarkeşlər qarşısında alacağıq. Bu, daha vacibdir.
- Çempionluğu necə qeyd edəcəksiniz?
- Rəhbərlik necə qərar versə, elə də olacaq. Böyük mərasim təşkil olunacağını düşünmürəm. Son günlərdə cəbhə xəttində əsgərlərimiz şəhid olur. Ona görə belə bir vəziyyətdə bizim hansısa bayram təşkil etməyimiz düzgün olmaz.
- Bu çempionluğu kimə həsr etmək istərdiniz?
- Çempionluğu vətənimizin keşiyində duran bütün əsgərlərimizə həsr edirəm.
- Yəqin ki, bundan sonrakı hədəfiniz kuboku da qazanaraq "qızıl dubl" etmədkri?
- Yenidən bu uğura imza atmaq istərdik. Çünki belə olan halda ikiqat sevinc olacaq.
- Heç bir turnir əhəmiyyəti daşımayacaq son dörd çempionat matçına çıxmaq çətin olmayacaq?
- Qarşıdakı oyunlar da bizim üçün vacibdir. Qarşıda bizi milli komandanın toplanışı gözləyir. Üstəlik, yeni avrokubok mövsümü öncəsi tonusu qorumaq lazımdır. Arxayınlaşmaq olmaz. Qurban Qurbanov mövsümün sonunadək ciddi olmağımızı tapşırdı.
