Stiv Olfers: Qarabağın ilk pilləni əldn verməsi inandırıcı deyil

"Qəbələ"nin sabiq müdafiəçisi Stiv Olfers keçmiş komandasının, eləcə də "Qarabağ"ın çıxışından danışıb, öz karyerası və Azərbaycana mümkün qayıdışı barədə fikirlərini söyləyib. Azerisport.az saytına açıqlamasında o, öncə bunları söyləyib:

"Əlbəttə, "Qəbələ"nin çıxışı ilə yenə maraqlanıram. Düzdür, oyunlarını televiziya vasitəsilə izləmək imkanım yoxdur. Çünki Hollandiyada Azərbaycan kanalları göstərmir. Ona görə də matçlara canlı baxmaq hər zaman mümkün olmur. Ona görə də "Qəbələ"nin çıxışını internet vasitəsilə izləyirəm".

Olfersin sözlərinə görə, "Qarabağ"a bu mövsüm də çempionluq yolunda heç kim mane ola bilməyəcək: "Turnir cədvəlinə əsasən demək olar ki, "Qarabağ"ın liderliyini əldən verməsi artıq inandırıcı görünmür. Bu komanda doğrudan da çox güclüdür. Onların bu mövsüm də Premyer Liqanın qalibi olacağına şübhə etmirəm. Həmyerlim Con van Leonun "Qarabağ"dan ayrılmasına isə çox üzüldüm. Fikrimcə, bu, klub üçün də yaxşı addım olmadı".

Olfers indiki durumundan da söz açıb: "Sonuncu klubum "Telstar" olub. Hazırda isə klubsuzam. İndi yeni mövsüm üçün klub axtarışındayam. Başa düşürəm ki, bu yaşımda çətindi. Çünki 34 yaşım var. Amma mən hələ karyeramı başa vurmaq istəmirəm. Təkliflər də var, sadəcə, qərar verməyə tələsmək istəmirəm".

Hollandiyalı futbolçu yenidən Azərbaycana qayıtmağın da əleyhinə olmadığını bəyan edib: "Azərbaycana qayıtmağın, xüsusilə də "Qəbələ"də oynamağın əleyhinə olmazdım. Amma bunun nə dərəcədə real olduğunu deyə bilmərəm. Əlbəttə, klub rəhbərliyindən təklif alsam, düşünərəm. Çünki orada oynamışam, tanış insanlar çoxdur".