Arif Əsədov: Finalda Qarabağ ya Qəbələ ilə oynayacaq, ya da Neftçi ilə
"Neftçi"nin sabiq baş məşqçisi Arif Əsədov Azərbaycan Kubokunun yarımfinal mərhələsi çərçivəsində baş tutacaq ilk oyunlar öncəsi azerisport.az saytının suallarını cavablandırıb.
- Kubokun ilk yarımfinal oyunlarından nə gözləyirsiniz?
- Dörd komandanın hər biri bu mərhələdə oynamağa layiqdir. Mənim üçün "Neftçi" və "Qəbələ" arasındakı görüşlər daha maraqlıdır. Şanslar bərabərdir. İntriqa olacaq. Digər yarımfinal cütündə isə "Qarabağ" "İnter"lə görüşlərin aşkar favoritidir. Amma kubokda sürpriz mümkündür. Baxmayaraq ki, ağdamlıların ötən il olduğu kimi, bu mövsüm də həm çempionatda, həm də kubokda qalib olmaq istədiklərinə şübhə etmirəm. "İnter" hətta kuboku qazansa belə, növbəti mövsüm avrokuboklarda çıxış edə bilməyəcəklər. Bu, motivasiyaya da təsirsiz ötüşməyəcək.
- "Neftçi"nin "Qəbələ"yə müqavimət göstərəcəyinə inanırsınız?
- Kubok və çempionat oyunları tamamilə fərqlənir. Bakılıların çempionatdakı vəziyyəti acınacaqlıdır. Ona görə də bütün diqqətlərini kuboka yönəldiblər. Həm də "Qəbələ" nə qədər yaxşı heyətə malik olsa da, ideal oyun formasından uzaqdır. Qeyri-sabitlik bütün mövsüm boyu onlardan əl çəkmədi.
- Sizcə, bu komandaların ilk oyununda hansı nəticə qeydə alına bilər?
- Bunu proqnozlaşdırmaq çətindir. "Neftçi" ilk oyunun ev sahibi olduğuna görə, bu komandaya müsbət nəticə qazanmaq daha çox lazımdır. Şübhəsiz ki, qapılarını toxunulmaz saxlamağa çalışacaqlar. Bunu bacarsalar, işin yarısını görmüş olacaqlar. Eyni zamanda bir-iki qol vurmaq da pis olmazdı.
- Bəs ilk oyunda qonaqlar qələbə qazansalar, "Qəbələ" finala hazırlaşa bilər?
- Baxır hansı hesabla qalib gəlirlər. Minimal hesablı qələbə "Qəbələ"nin finala çıxacağına zəmanət verə bilməz. Çünki "Neftçi" çempionatın cari mövsümündə Qəbələdə qələbə qazanıb.
- "Qarabağ" çempionatın son turunda da "İnter"lə qarşılaşdı və 2:0 hesabıyla qalib gəldi. Amma oyundan sonra nəticədən çox ağdamlıların sərgilənən futbol baxımından rəqibini çox üstələdiyi danışıldı...
- Əminəm ki, "İnter" kubok matçlarında elə oynamayacaq.
- Finalda kimləri görürsünüz?
- Finalda "Qarabağ" ya "Qəbələ" ilə oynayacaq, ya da "Neftçi" ilə.
