Nelson Bonilya: Seriyanı davam etdirmək istəyirik
"Zirə"nin hücumçusu Nelson Bonilya Topaz Premyer Liqasının 31-ci turu çərçivəsində "Neftçi" ilə qolsuz heç-heçədən sonra azerisport.az saytına müsahibə verib:
- Matçla bağlı fikirləriniz?
- Ağır oyun oldu. Xüsusilə də bizim üçün. Baxmayaraq ki, görüşə ciddi hazırlaşmışdıq. Əsas odur ki, uduzmadıq və bir xal qazandıq.
- "Zirə" bu oyunda çox az qol vəziyyəti yaratdı...
- Fikrimcə, heç-heçə bizim üçün pis nəticə deyil. Çünki səfərdə oynayırdıq. Matç bizim üçün mövsümün ən çətin oyunlarından biri oldu.
- Hiss olunurdu ki, siz bir xal üçün mübarizə aparırsınız...
- Xeyr, biz qələbə qazanmaq istəyirdik. Amma sonda bir xalla kifayətlənməli olduq. Biz həmişə qələbə üçün oynayırıq. Bu matçın da sonunda qol vurmağa yaxın idik. Sadəcə, rəqib qapıçı qola imkan vermədi. Həmin epizodda heç də qorxmadım. Epizodu qolla başa vurmaq istəyirdim. Amma qapıçı komandasını qoldan xilas edə bildi.
- Qarşıda sizi "Qarabağ"la oyun gözləyir. Ağdam klubu sizinlə görüşdə çempionluğunu təmin edə bilər...
- Rəqibin heyətində əla futbolçular var. "Qarabağ" komanda olaraq çox yaxşı mübarizə aparır. Amma biz də bu mövsüm doğma meydanda uduzmamışıq. Bu seriyanı davam etdirməyə çalışacağıq. Lakin liderə qarşı bizi çətin oyun gözlədiyini anlayırıq.
- Mətbuatda sizin "Qarabağ" və Serbiya "Partizan"ına keçəcəyiniz barədə xəbərlər dolaşır. Siz "Zirə"dən getmək istəyirsiniz?
- Mən bu klublardan təklif almamışam. Heç onların məni heyətində görmək istədiyini eşitməmişdim də. Bütün diqqətim "Zirə"nin qarşıdakı oyunlarına yönəlib. Bakını sevirəm. Hər şeyə mövsüm bitəndən sonra aydınlıq gələcək.
- Bombardirlər yarışını qalib başa vura biləcəksiniz, ya Dani Kintanaya uduzacaqsınız?
- Mən özümü yaxşı hiss edirəm və klubuma kömək etmək istəyirəm. Amma biz komanda oyunu sərgiləyirik. İmkan düşəndə də qol vururam. Kintana böyük futbolçudur. Onunla rəqabətimiz davam edir. Necə olacağını mövsümün sonunda görəcəyik (gülür).
