Erik Ramos: Azərbaycan haqda heç vaxt pis nəsə danışa bilmərəm

"Neftçi"nin yarımmüdafiəçisi Erik Ramos Topaz Premyer Liqasının 31-ci turu çərçivəsində "Zirə"yə qarşı keçirdikləri oyundan (0:0) sonra azerisport.az saytının suallarını cavablandırıb.

- Oyun barədə nə deyə bilərsiniz?
- Çətin oyun alındı. Meydanda çox güc qoyduq. Təəssüf ki, qələbə qazana bilmədik. Amma yaxşı olacağına inanırıq. Qarşıda "Qəbələ" ilə üç vacib oyunumuz var.

- Çoxdandır müsahibə vermirsiniz. Özünüzə sual verirsiniz ki, jurnalistlər niyə sizdən müsahibə almırlar?
- Sadəcə, mənim dediklərimi ispan dilindən tərcümə edən yoxdur. İngilis dilini də bilmirəm.

- Bəs tək ispan dili ilə Bakıda yaşamaq çətin deyil?
- İngilis dilində az da olsa, başa düşürəm və bu, kifayət edir. Bu baxımdan xüsusi problem hiss etmirəm.

- Artıq yayda "Neftçi"dən gedəcəyinizi demisiniz. Bu klubda gələcəyinizin olmadığını bilə-bilə oyunlara köklənmək çətin deyil ki?
- Burada kifayət qədər vaxt keçirmişəm. Heç bir problem yoxdur və ola da bilməz.

- Siz "Neftçi"nin çempion olduğu dövrlərdə də bu klubda oynamısınız. Komandanın indiki vəziyyətində oynamaq çətin deyil?
- Təəssüf ki, biz əvvəlki gücümüzü qoruya bilməmişik. Amma gələcəkdə hər şeyin yaxşı olacağına ümid edirəm.

- Bəs klubunuz həmin gücünü niyə qoruya bilmədi?
- Yeni layihələrlə bağlı problem var. Onları düzgün qurmayıblar. Hər dəfə yeni işçilər, futbolçular gəlir və ritm pozulur.

- Azarkeşlər də komandaya inamlarını itiriblər...
- Heç kim bu vəziyyətə düşməyimizi istəməzdi. Yaxın iki ildə vəziyyət düzələcək.

- Son dövrlər manatın devalvasiyasına görə Azərbaycanı tərk edən legionerlər ölkələrində heç də tərif yağdırmırlar. Bəs siz nə danışacaqsınız?
- Azərbaycan barədə heç vaxt pis nəsə danışa bilmərəm.