Elbrus Məmmədov: Bizə bu oyunda soyuqqanlılıq çatışmırdı
"Xəzər Lənkəran"ın baş məşqçisi Elbrus Məmmədov Topaz Premyer Liqasının 31-ci turu çərçivəsində "Qəbələ"yə qarşı keçirdikləri oyunu şərh edib. Azerisport.az xəbər verir ki, cənub klubunun çalışdırıcısı 0:1 hesabıyla bitən qarşılaşmadan sonra bunları söyləyib:
"Bizə bu oyunda soyuqqanlılıq çatışmırdı. Əks halda təşkil etdiyimiz hücumları qolla tamamlaya bilərdik. Qapımıza ilk zərbədən sonra qol buraxmağımız üzücü oldu. Həmin epizodda bizim futbolçular dayandılar, feyr-pley gözləyirdilər. Amma orada hər şeyə hakim qərar verdi. Səhvlərimiz oldu və bunları aradan qaldırmağa çalışacağıq. Orxan Sadıqlı ilə Nodar Məmmədov arasındakı mübahisəyə gəlincə, əlbəttə, bu, xoşagəlməz haldır. Fikrimcə, bu yorğunluqdan və qələbə qazanmaq istəyindən irəli gəlirdi. Ola bilsin ki, bir-birilərini başa düşməmişdilər. Nə baş verdiyini daha sonra öyrənəcəyəm". (CBC)
