Migel Madera: İnteri kubokda da keçə bilərik
"Qarabağ"ın yarımmüdafiəçisi Migel Madera Topaz Premyer Liqasının 31-ci turu çərçivəsində "İnter"ə qarşı keçirdikləri oyundan (2:0) sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Çətin oyun alındı. Buna baxmayaraq, biz növbəti üç xalı qazanıb, hədəfimizə bir qədər də yaxınlaşdıq.
- Sizə elə gəlmir ki, qələbəni asanlıqla əldə etdiniz?
- Rəqib 90 dəqiqə müdafiə olundu. Buna görə də biz bütün oyunu topa nəzarət etməyə, hücumlar qurmağa çalışırdıq. Daha çox qol vura bilərdik. Çünki bu görüşdə yetərincə qol epizodumuz oldu.
- Adətən, ispanlar soyuqqanlı olurlar, amma siz çox aqressiv idiniz...
- Mən özümü tamamilə oyuna verirəm. Ola bilsin ki, buna görə hərdən emosiyalarımı qoruya bilmirəm. Belə olan vəziyyətlərdə baş məşqçi mənə sakit olmağı məsləhət görür. Amma bu, həmişə alınmır.
- Mövsümün əvvəlində sizə çox az adam inanırdı. Amma hazırda yeni gələnlər arasında meydanda ən çox vaxt keçirən sizsiniz...
- Mən mövsümün əvvəlində formada deyildim. Üstəlik, Premyer Liqaya uyğunlaşmağım lazım idi. İndi isə yaxşı formadayam. Mənə şans verirlər, mən də bundan yararlanıram.
- Qarşıda "İnter"lə kubok oyunlarınız da var. Həmin görüşlərdən nə gözləyirsiniz?
- Çətin olacaq. "İnter" çətin rəqibdir. Müdafiə olunmağı bacarır. Amma biz onları keçə bilərik.
- Deyəsən, əvvəllər çempion olmamısınız. Amma "Qarabağ"la ilk dəfə belə bir titul qazanmağa yaxınsınız...
- Mənim kubokda qələbəm var. Amma çempionatda qalib olmamışam. Bu, məni daha da motivasiya edir.
- Bu, çempionatımızdakı ilk mövsümünüzdür. Necə dəyərləndirərdiniz?
- Özümü burada yaxşı hiss edirəm. Sanki öz evimdəyəm. Şəraitimiz də yaxşıdır.
- "Qarabağ"ı İspaniya klubları ilə müqayisə edə bilərsiniz?
- Komandamız oyun stilinə görə "Barselona"ya oxşayır. Amma keyfiyyət baxımından təbii ki, "Qarabağ" İspaniya klubuna uduzur.
