Maksim Medvedev: Qarabağdan heç bir yerə getmək istəmirəm

"Qarabağ"ın müdafiəçisi Maksim Medvedev Topaz Premyer Liqasının 31-ci turu çərçivəsində "İnter"ə qarşı keçirdikləri oyundan (2:0) sonra azerisport.az saytının suallarını cavablandırıb.

- Matçla bağlı fikirləriniz....
- Ağır matç alındı. Amma vacib görüş idi. Bu mərhələdə səhvə yol vermək istəmirik. Yaxın izləyicilərimizlə xal fərqini qorumaq istəyirik. Bizim üçün bu oyunda hər şey yaxşı alındı, top saxlamağı bacardıq.

- Sizə elə gəlmir ki, rəqib zəif oynadı?
- Bu, onların işidir. Biz öz işimizi görürük. Ola bilsin ki, onlar öz güclərini kubok oyunlarına qoyurlar. Yəqin ki, orada daha güclü heyətlə oynayacaqlar.

- Bəs "Qarabağ" öz seçimini hansı turnirdən yana edib?
- Bizim üçün hər iki turnir vacibdir. Biz kubokun da qalibi olmaq istəyirik.

- Sizə elə gəlmir ki, "Qarabağ" rəqiblərini həddən artıq qabaqlayır?
- Bizim öz strukturumuz var. Əvvəllər 14-15 futbolçu ilə mübarizə aparırdıq. Amma indi iki heyətlə çıxış edirik.

- Bəs sizin ciddi rəqibinizin olmamasına münasibətiniz necədir?
- Rəqabət olmasaydı, biz üç oyunda uduzmazdıq.

- Üç məğlubiyyət çoxdur ki?
- Cəmi üç oyunda uduzmağımız məni sevindirir. Amma hər oyunda çox qol vurub, az top buraxmaq istəyirik.

- Mövsümün son oyunlarını süni örtüklü "İnter Arena"da keçirəcəksiniz. Bu, sizi narahat etmir ki?
- Bəli, çətin olacaq. Biz zədə almaq istəmirik. Süni örtüklü meydanda oynamaq daha çətindir. Çünki biz hətta məşq edəndə də yaxşı, təbii örtüklü qazonda hazırlaşırıq.

- Maraqlıdır, sizinlə bağlı heç bir transfer xəbəri olmur...
- "Qarabağ" mənim üçün doğma klubdur. Uşaqlıqdan burada oynayıram. Burada daha çox vaxt keçirirəm, nəinki evdə. Heç bir yerə də getmək istəmirəm. Transfer söhbəti olan kimi də dərhal yox deyirəm.