Rəşad Abdullayev: Digər klublara kömək etməyə hər birimiz hazırıq
"Zirə"nin kapitanı Rəşad Abdullayev Topaz Premyer Liqasının 31-ci turu çərçivəsində "Neftçi"yə qarşı keçirəcəkləri oyun öncəsi azerisport.az saytının suallarını cavablandırıb.
- Bir neçə gnü öncə "Zirə"nin prezidenti Vüqar Astanov maraqlı açıqlama verdi. O, aparıcı futbolçularının avrokuboklarda ölkəmizi təmsil edəcək digər klublara müvəqqəti icarəyə verilməsinin mümkünlüyünü dilə gətirdi. Siz bu barədə nə deyə bilərsiniz?
- Avropada Azərbaycanı təmsil edirik. Burada söhbət hansısa ayrı-ayrı klubdan yox, ölkədən gedir. Azərbaycan naminə birləşməyimiz vacibdir. Hazırda "Zirə"nin avrokuboklarda iştirakı sual altındadır. Təbii ki, komandamız qitə arenasında çıxış etmək şansı qazana bilməsə, biz hamımız digər klublara kömək etməyə hazırıq.
- Şəxsən siz buna razı olarsınız?
- Yüz faiz. Klub rəhbərliyi lazım bilsə, kömək etməyə hazıram. Çünki istənilən halda biz hər birimiz futbolumuzun inkişafı üçün çalışırıq.
- Belə olan halda "Zirə" növbəti mövsüm tam heyətlə hazırlaşa bilməyəcək ki, bu da sonralar komandanızın çıxışına mənfi təsir göstərə bilər...
- Fikrimcə, problem olmaz. Əksinə, digər klublara kömək etməyimiz bizim üçün əlavə stimul olacaq.
- Böyük ehtimalla, "Zirə"nin oyunçularına AZAL, "Kəpəz" və ya "Neftçi" ehtiyac duyacaq. Çünki "Qarabağ" və "Qəbələ"nin cinah oyunçularına ehtiyacı yoxdur. Bəs siz hansı klubu seçərdiniz?
- Yəqin ki, AZAL-ı. Amma bu, gələcəyin işidir. İndi bu barədə danışmağa dəyməz. AZAL kimi, "Kəpəz" də mənim üçün yaxın klubdur. Amma istənilən klubumuza kömək etməyə hazıram.
- Vaxtilə "Neftçi"də də oynamısınız. Amma bu klub hazırda çətin günlərini yaşayır...
- "Neftçi" bilirsiniz indi hara gedir? Bu klub Hans-Yurgen Gedenin dövrünə qayıdır. Mən o vaxt yenicə bu kluba keçmişdim. "Neftçi"nin özünə gəlməsi lazımdır. Şəxsən mənə qəribə gəlir ki, necə bu klub liderlərdən 20-30 xal geri qala bilər? Düzdür, bu, mənim indiki klubumun xeyrinədir. Amma bütövlükdə, "Neftçi" bu vəziyyətdə olmamalıdır. Çünki bu komanda futbolumuzun flaqmanıdır. "Neftçi"nin əvvəlki qüdrətini qaytarmaq üçün rəhbərlik və komanda üzvlərinin birləşməsi lazımdır.
