Yuri Fomenko: Qarabağa hər üç oyunda qalib gəlmək istəyirik
"İnter"in hücumçusu Yuri Fomenko Topaz Premyer Liqasının 31-ci turu çərçivəsində "Qarabağ"a qarşı keçirəcəkləri oyun öncəsi azerisport.az saytının suallarını cavablandırıb.
- "Qarabağ"la oyuna hazırlıq necə gedir?
- Komandamız bu oyuna yaxşı köklənib, qələbə qazanmaq istəyirik. Heyətdə itkilərimiz var. Amma hansı komandada mövsümün sonunda belə itkilər olmur ki? İtkilərin olmasına baxmayaraq, meydana çıxıb, oynamalıyıq.
- Komandanızın mövsümün sonunda avrokuboklara buraxılmayacağı faktı sizi narahat etmir?
- Siz məsləhət görürsünüz ki, oynamayaq? Hədəfimiz qələbə qazanmaqdır. Hər oyuna belə köklənirik. Avrokuboklarda oynayıb-oynamayacağımız barədə indi düşünmək istəmirik.
- Qarşıda sizi "Qarabağ"la üç oyun gözləyir. Biri çempionat, ikisi kubok çərçivəsində. "İnter" bu oyunların neçəsində qalib gələ bilər?
- İstərdim ki, bütün oyunlarda qalib gələk (gülür). Amma sualınızın cavabını oyunlar göstərəcək. Hər şey ola bilər. "Qarabağ" elə komandalardandır ki, onlara qarşı oynamaq həmişə xoşdur. Belə oyunlarda özünü yaxşı tərəfdən göstərmək, uğur qazanmaq istəyirsən.
- Son turda "Kəpəz"in qapısına vacib qol vurdunuz. Davamı olacaq?
- Ümid edirəm. Əlbəttə, qol vurmağa davam etməyi özüm də çox istəyirəm.
- Mövsüm ərzində cəmi 3 qol vurmusunuz. Sizə elə gəlmir ki, bu, bir hücumçu üçün çox azdır?
- Əlbəttə, azdır. Daha çox qol vurmaq lazımdır.
- Rauf Əliyev zədəli olduğundan, uzun müddət sizinlə rəqabət aparan olmadı. Amma artıq o, sıraya dönüb...
- Onun yoxluğunda necə çalışırdımsa, bundan sonra da elə çalışacağam. Əlbəttə, rəqabət olanda stimul daha da çox olur.
- Müqavilənizin müddəti başa çatmaq üzrədir. Növbəti mövsüm üçün planlarınız necədir?
- Bu barədə bir aydan sonra düşünəcəyəm. İndidən heç nə deyə bilmərəm. Hər şey ola bilər.
- Hətta "Kəpəz"ə də qayıda bilərsiniz?
- Hər şey ola bilər. "İnter"də qala da bilərəm, gedə də. Necə olacağını zaman göstərəcək.
