Ağabala Ramazanov: İki xarici klubdan və İnterdən təklif almışam

"Sumqayıt"ın hücumçusu Ağabala Ramazanovun azerisport.az saytına müsahibəsi

- Yayda "İnter"ə keçəcəyiniz barədə yayılan xəbərlər həqiqətdir?
- Mənə "İnter"dən də təklif var, başqa klublardan da. Hətta iki xarici klubdan da dəvət almışam. Amma mövsümün sonunadək bu barədə düşünmək fikrim yoxdur. Diqqətimi oyunlarımıza yönəltmişəm. Seçimimi isə yayda edəcəyəm.

- Bu seçiminizi nəyə əsasən edəcəksiniz?
- Mütəmadi oynayacağım, gələcəyim üçün faydalı ola biləcək bir kluba keçəcəyəm.

- Qarşıdakı turda "Sumqayıt"ı "Kəpəz"lə oyun gözləyir. Bu matça hazırlıq necə gedir?
- Bu görüşə çox ciddi hazırlaşırıq. "Kəpəz"ə qalib gəlmək istəyirik.

- Gəncəlilərin son turlardakı zəif oyunu sizin üçün üstünlük sayıla bilər?
- Hər bir komanda eniş və yüksəliş dövrü olur. Biz buna diqqət vermirik. Rəqibin yaxşı heyəti var. "Kəpəz"in necə ciddi rəqib olduğunu turnir cədvəlindəki mövqeyi də göstərir. Bizə çətin olacaq.

- Daha çox ehtiyatlandığınız futbolçu var?
- Gəncə klubunun heyətində yaxşı yerli futbolçular var. Amma mən Premyer Liqamızda heç kimdən ehtiyatlanmıram.

- "Sumqayıt" özü də qeyri-sabit çıxış edir. Bunun səbəbi nədir?
- Yaxşı heyətimiz var. Komanda yaxşı futbol sərgiləyir. Amma nəsə alınmır. Ola bilsin ki, bəxt amili sözünü deyir. Biz də çempionatdakı mövqeyimizdən narazıyıq. Mövqeyimizi yaxşılaşdırmaq istəyirik.

- Bir müddət öncə komandanızı üç futbolçu tərk etdi. Digər oyunçular arasında da "Sumqayıt"dan uzaqlaşdırılacağından qorxanlar var?
- Gedən futbolçuların hər birinə karyeralarında uğurlar arzulayıram. Amma digər oyunçular arasında belə bir qorxu yoxdur.

- Azərbaycan yığmasının may ayında Avstriya toplanışı çərçivəsində qarşılaşacağı Makedoniya və Kanada ilə sınaq matçlarından nə gözləyirsiniz?
- Güclü rəqiblərdir. Amma məğlubedilməz komanda yoxdur. Bu matçlarda özümüzü yaxşı tərəfdən göstərməliyik.