Fərid Nəbiyev: Doğma meydan amili AÇ-də əsas üstünlüyümüz olacaq
Azərbaycanın U-17 yığmasının liderlərindən biri - Fərid Nəbiyev Bakıda təşkil olunacaq Avropa çempionatı öncəsi azerisport.az saytının suallarını cavablandırıb.
- Püşkatmadan başlayaq. Azərbaycan yığmasının rəqibləri barədə nə deyərdiniz?
- Bəxtimizin gətirdiyini deyə bilmərəm. Amma digər qrupların da tərkibində güclü komandalar yer alır. İstənilən halda bizə rəqib olan komandalarla oynamaq olar.
- Portuqaliya, Belçika və Şotlandiya yığmaları barədə nə deyə bilərsiniz?
- Bu komandalardan yalnız Portuqaliya ilə qarşılaşmışıq. Digərləri barədə xüsusi məlumatım yoxdur. Amma bir halda ki, rəqibimizdilər, onlar barədə ətraflı məlumat toplayacağıq.
- Amma razısınız ki, millimiz "ölüm qrupu"na düşməyib?
- Razıyam. Amma istənilən halda çətin qrupdayıq. Söhbət AÇ-nin final mərhələsinin qrupundan gedir, burada zəif komanda yoxdur, hamısı güclüdür. Uğur qazanmaq üçün əlimizdən gələni edəcəyik.
- Yəqin ki, İngiltərə, Fransa və Almaniya yığmalarının bizə rəqib olmaması üçün dua edirdiniz?
- (gülür) Xeyr, dua etmirdim. Amma bizim rəqiblərimiz qeyd etdiyiniz komandalardan zəif deyil.
- Komandamız AÇ-yə nə dərəcədə hazırdır?
- Biz çempionata hazırıq. Evdə, doğma azarkeşlərimizin gözü qarşısında oynayacağıq. Bu da bizim üstünlüyümüzdür. Bu, bizə kömək edə bilər.
- Bəs komandamızın qarşısında hansı hədəf durur?
- Öncə qrupdan çıxmalıyıq.
- Millimizin AÇ-ni qazanması realdır?
- Bu, bizim üçün arzu deyil. Futbolda hər şey ola bilər. Çalışacağıq.
- Yəqin ki, Bakıya tanınmış klubların menecerlərinin gələcəyini bilirsiniz. Özünüzü yaxşı tərəfdən göstərə bilsəniz, hansısa aparıcı klubun diqqət mərkəzinə düşə bilərsiniz. Bəs siz hansı klubda peyda olmaq istərdiniz?
- Avropada oynamağı hər bir futbolçu istəyər. Mən də həmçinin. Ümid edirəm ki, bu AÇ mənim üçün də uğurlu alınacaq.
- Səhv etmiriksə, iki il öncə İtaliyanın "Udineze" klubuna keçə bilərdiniz. Niyə alınmadı?
- Belə söhbət varidi. Amma dəqiq niyə alınmadı, bilmirəm. Klub belə qərar verdil.
- Azarkeşlərə demək istədiyiniz nəsə var?
- Çox istərdim ki, azarkeşlərimiz bizimlə olsunlar, dəstəkləsinlər. Stadiona gəlin, bizə azarkeşlik edin. Allah eləsin ki, birgə uğur qazanaq.
