Qvanzav Maqomedov: Vaqif Cavadova demək istəyirəm ki, mən legioner deyiləm

AZAL-ın müdafiəçisi Qvanzav Maqomedov Topaz Premyer Liqasının 30-cu turu çərçivəsində "Sumqayıt"a qarşı keçirdikləri oyundan, eləcə də bu görüşdə rəqib futbolçu Vaqif Cavadovla aralarında yaranan münaqişədən söz açıb. Azerisport.az saytına açıqlamasında o, bunları söyləyib:

"İlk növbədə Vaqif Cavadova onu bildirmək istərdim ki, mən legioner deyiləm. İkincisi, Cavadov özü ilk olaraq mənim valideynlərimə söydü. Üçüncüsü, Səlahət Ağayevə məsləhət görərdim ki, kimin təhqirə yol verdiyini öz komanda yoldaşlarından soruşsun".

"Heç vaxt imkan vermərəm ki, kimsə mənim yaxınlarımı söysün. Heç özüm də kiminsə yaxınlarını söymərəm. Vaqif də istisna deyil. Meydanda biz mübarizə aparırıqsa, valideynlərin, qohumların bura nə dəxli? Matçdan sonra biz problemi yoluna qoyduq və bir-birimizin əlini sıxdıq. Vaqif deyir ki, legioner futbolçunun yerli oyunçusu söyməyə haqqı yoxdur. Axı mən legioner deyiləm. Belə olan halda o, nəyin söhbətini edir? Başa düşürəm ki, bu, futboldur, emosiyalar ən üst həddə olur. Hər kəs meydandakı digər futbolçulara qışqıra, nəsə deyə bilər".

Maqomedov Vaqifin sözlərinə xarici futboldan misal gətirməklə də cavab verməyə çalışıb: "İspaniyada Ronaldo Pikeyə qışqırsa və ya onu təhqir etsə, deməlidirlər ki, "sən legionersən, səsini kəs?" Yaxud da Messi Serxio Ramosa qarşı eyni hərəkəti etsə, "sus, sən legionersən deməlidirlər? Bu nə deməkdir ki?"

"Matçdan sonra tribunadan kimsə mənim üstümə qışqırdı. Cavadov mənə dedi ki, o, mənim qohumum deyil, heç tanımır da. Mən ata tərəfdən azərbaycanlıyam. Özü də Azərbaycan vətəndaşıyam. Digər tərəfim isə Dağıstandandır. Həmişə Azərbaycanla Dağıstanın qardaş olduğunu deyirlər. İndi bircə münaqişəyə görə legioner oldum? Əsas odur ki, bütün bunlar artıq geridə qalıb".