Ramal Hüseynov: Bizim çempionatı sevmirəm
Futbol üzrə Azərbaycan yığmasının sabiq futbolçusu, hazırda Türkiyənin həvəskarlardan ibarət liqasında çıxış edən "Arhavispor"un şərəfini qoruyan Ramal Hüseynov öz işlərindən danışıb. Azerisport.az saytına açıqlamasında o, bunları söyləyib:
"Türkiyədəki işlərim yaxşıdır. Klubumuz yaxşı transferlər edib. Üçüncü diviziona yüksəlmək istəyirik. Öz futbolumuza gəlincə, etiraf edim ki, ümumiyyətlə maraqlanmıram. Çünki hər şey öncədən bilinir ki, hansı klub çempion olacaq, hansı klub nə edəcək. Öz çempionatımızı sevmirəm. Mən vaxtında Azərbaycandan çıxmalıydım. Vaxtında oranı tərk etsəydim, daha böyük klublarda çıxış edərdim. Azərbaycanda ən yaxşı çempionat 2004/05 mövsümündə olub. İndi bizdə elə çempionat yoxdur. İnanın ki, bizim oynadığımız dördüncü liqa Premyer Liqamızdan maraqlıdır. Hər oyunumuza 10 min azarkeş gəlir".
Qeyd edək ki, Ramalla yanaşı, qapıçı Anar Məhərrəmov da "Arhavispor"da çıxış edir. Hazırda bu komanda 26 turdan sonra 38 xalla 14 klub arasında 7-ci pillədə qərarlaşıb. Məhərrəmov 19 oyunda, özü də start heyətdə meydana çıxıb və 1607 dəqiqə oynayıb, 2 sarı, 1 qırmızı vərəqə ilə cəzalanıb. Hüseynov isə 23 matçda meydanda olub ki, onların da 22-də start heyətdə yer alıb (1939 dəqiqə). Bu görüşlərdə 1 qol vurub, 11 sarı vərəqə alan Ramal 1 dəfə də meydandan qovulub.
