Tino Peres: Mənə yeni baş məşqçiyə uğurlar arzulamaq qalır

Futzal üzrə Azərbaycan yığması ilə yollarını ayıran ispaniyalı mütəxəssis Tino Peres azerisport.az saytının suallarını cavablandırıb.

- Siz millimizin baş məşqçi postunu həqiqətən də ailə vəziyyətinizə görə tərk edirsiniz?
- Bəli. Ailəsiz yaşamaq çox çətindir.

- Bu, yeganə səbəbinizdir? Bir müddət öncə siz müsahibənizdə Azərbaycanda futzalın inkişafı yönündə heç bir addım atılmadığını demişdiniz...
- Azərbaycanı tərk etməyimin yeganə səbəbi ailə vəziyyətimdir. Bundan sonra ailəmə daha yaxın olmaq istəyirəm.

- Deməli, bundan sonra İspaniyada çalışacaqsınız?
- Hələ bu barədə heç nə deyə bilmərəm. Hələ bir müddət istirahət etməli olacağam. Ondan sonra iş barədə düşünmək olar.

- Ölkəmizi hansı hisslərlə tərk edirsiniz?
- Yaxşı. Şadam ki, Azərbaycan yığmasında işləmək mənə nəsib oldu. AFFA-nın baş katibi Elxan Məmmədov, futzal federasiyasının prezidenti Zaur Axundov sağ olsun ki, məni bura dəvət etdilər, inandılar.

- İndiki komandanı məhz siz formalaşdırmısınız. Sizə elə gəlmir ki, yeni baş məşqçi üçün bu komandaya qısa vaxt ərzində uyğunlaşmaq, Kolumbiyadakı dünya çempionatında uğur qazanmaq çətin olacaq?
- Mənə ancaq yeni baş məşqçiyə uğurlar arzulamaq qalır. Azərbaycanın güclü komandası var. Bu komanda Kolumbiyada uğur qazana bilər.

- Bəs boşaltdığınız posta kimin gətirilməsini məsləhət görərdiniz?
- Bu sualı müvafiq funksionerlərə verməyiniz lazımdır. Çünki buna onlar qərar verəcək.