Fikrət Hüseynov: AZAL avrokuboklara vəsiqə qazansa, heyət güclənəcək
AZAL-ın vitse-prezidenti, AFFA Klublar Komitəsinin sədri Fikrət Hüseynov bu gün jurnalistlər üçün brifinq keçirib. Azerisport.az xəbər verir ki, o, öncə bunları söyləyib:
- Öncə AFFA yanında Media Komitəsinin üzvləri ilə görüşdük. Bu iki komitə arasında tandem yaratmaq lazımdır.
- Maraqlıdır, ondan sonra nəyin mübahisəsini edirdiniz?
- Legionerlərə görə ödənilən rüsumla bağlı məsələni müzakirə edirdik. Hansı ki, bununla bağlı etdiyimiz təklif AFFA İcraiyyə Komitəsi tərəfindən qəbul olunmadı. Halbuki, biz rüsumun azaldılacağını gözləyirdik. AFFA-nın baş katibi Elxan Məmmədov bununla bağlı işçi qrupunun yaradılmasını təklif etdi. İşçi qrupuna üç nəfər daxildir: mən, Elnur Məmmədov və Fariz Nəcəfov. 10 gün ərzində Elxan Məmmədovla görüşüb, ortaq məxrəcə gəlməyə çalışacağıq. Daha sonra isə İcraiyyə Komitəsinin 2-3 üzvü - Vaqif Sadıqov, İsgəndər Cavadov və Qurban Qurbanovla görşüb, müzakirələr aparacağıq. Ola bilsin ki, iyun ayında İcraiyyə Komitəsi yenidən yığılsın və biz bu məsələləri yenidən müzakirə edək.
- Bəs Superkubokla bağlı nə qərara gəldiniz?
- Biz bu məsələni sonraya saxladıq. Bunun üçün PFL prezidenti Ramin Musayevlə görüşüb, məsləhətləşəcəyik.
- AZAL kiçik büdcəsinə rəğmən, uğurlu mövsüm keçirir. Sizə elə gəlmir ki, sponsor büdcəni artırmalıdır?
- Mövsümün əvvəlində klubun strategiyasını dəyişdik. Mövcud vəizyyətlə bağlı baş məşqçimiz Tərlan Əhmədovu məlumatlandırdıq. O, ağır yükün altına girdi və çox döyüşkən kollektiv formalaşdırdı. Biz cari mövsüm avrokuboklarda iştirak edə bilərik. Rəhbərliklə 2 həftə ərzində bu barədə görüşümüz olacaq və komanda güclənəcək.
- Deməli, sponsorlarınız avrokuboklarda iştirakınız üçün pul xərcləməyə hazırdır?
- Şübhəsiz ki, biz avrokuboklardan imtina etməyəcəyik. Avrokuboklara düşsək, oynayacağıq. Komandanın zəif yerlərini gücləndirəcəyik. Bu uşaqlar Avropa Liqasına vəsiqə qazanırsa, niyə orada da özləri oynamamalıdır? Qoy özləri oynasın. Amma transferlər də olacaq. Komandanı 4-5 futbolçunun tərk etməsi də mümkündür.
