Elmir Demiroviç: İbrahim Şehiç Qarabağdan ayrılmamalıdır
Məşhur bosniyalı futbol meneceri Elmir Demiroviç bəyan edib ki, "Qarabağ"ın qapıçısı, həmyerlisi olan İbrahim Şehiç Ağdam klubundan ayrılmamalıdır. Azerisport.az saytına açıqlamasında o, bunları söyləyib:
"Şehiçi yaxşı tanıyıram. Yaxşı qapıçıdır. Amma onu Bosniya-Herseqovina yığmasına yalnız "Qarabağ"dakı uğurlu çıxışından sonra çağırmağa başladılar. Mənim fikrimcə, Şehiç bu klubu tərk etməməlidir. "Qarabağ" onun üçün karyerasının pik nöqtəsidir. O, hələ uzun müddət bu komandada çıxış edə bilər. Buna görə də Şehiçə "Qarabağ"da qalmaq daha sərfəlidir. Məsələn, Türkiyədə "Qarabağ"dakı qədər oynaya bilmirdi. Amma iki ildir ki, Şehiç öz klubu ilə çempion olur, Avropa Liqasının qrup mərhələsində oynayır. Yığma karyerasına gəlincə, yaxşı qapıçı olsa da, "Çelsi"də çıxış edən Asmir Beqoviçdən üstün deyil".
