Vitali Vernidub: Mən atama Qəbələyə keçidimdən narazı olduğumu deməmişəm

"Qəbələ"nin müdafiəçisi Vitali Vernidub atasının onun Ukraynaya qayıdacağına dair verdiyi açıqlamaya münasibət bildirib. Azerisport.az saytına açıqlamasında o, bunları söyləyib:

"Mən atama "Qəbələ"yə keçidimdən narazı olduğumu deməmişəm. Bu, onun fikridir və hörmətlə yanaşıram. Mənim "Qəbələ"yə keçidim qiymətsiz təcrübədir. Az oynamağım isə ayrıca söhbətin mövzusudur. Hansı ki, bunun da öz səbəbləri var. Futbolçu səhvə yol verəndə onun ehtiyatda oturması normaldır. Bizdə bu mövqe ilə bağlı güclü rəqabət var. Dörd futbolçu əsas heyət uğrunda mübarizə aparır. Bu klubdakı gələcək taleyimə gəlincə, hazırda daha çox komandamın turnir cədvəlində irəliləməsinə kömək etmək barədə düşünürəm. Çünki layiq olduğumuz yerdə deyilik. "Qəbələ"də qalıb-qalmayacağımı isə mayın 20-dən sonra biləcəyik. O vaxt gələcək əməkdaşlığı müzakirə edəcəyik".