Adis Yahoviç: Azərbaycan yığması Makedoniyaya da uduzacaq
Futbol üzrə Makedoniya yığmasının hücumçusu Adis Yahoviçin azerisport.az saytına müsahibəsi
- Azərbaycanla yoxlama matçı keçirəcəyinizə dair xəbəri necə qarşıladınız?
- Azərbaycan yığması ilə yoxlama görüşü keçirəcəyimizdən xəbərim var. Şadam ki, belə bir rəqiblə qarşılaşacağıq. Amma hələ oyuna xeyli vaxt var.
- Azərbaycanı yığmanız üçün asan rəqib adlandırmaq olar?
- Xeyr, Azərbaycanı zəif rəqib saymıram. Yaxşı komandanız var. Azərbaycan çempionatının da güclü olduğunu düşünürəm. Klublarınız barədə eşitmişəm. "Qarabağ", "İnter"in çıxışından xəbərim var. Klublarınızın yaxşı maliyyə imkanları var. Belə klubları olan ölkənin yığma komandası zəif ola bilməz.
- Azərbaycana məğlub olsanız, bunu sizin üçün uğursuzluq saymaq olar?
- Xeyr. Biz də bu görüşdə qələbə qazanmağa çalışacağıq ki, komandada atmosferi yaxşılaşdıraq. Bizim yeganə problemimiz Qoran Pandevin zədəli olmasıdır. Amma yığmamızda başqa tanınmış futbolçular da var. Ona görə də maraqlı oyun olacağını düşünürəm.
- Yığmamız barədə informasiya toplamısınız?
- Komandanızla internet vasitəsilə maraqlanmışam. Amma elə də çox məlumatım yoxdur. Güclü futbolçularınızın olduğunu bilirəm. "Qarabağ"da, "Karlsrue"də çıxış edən futbolçularınız var.
- Oyunçulardan kimi qeyd edərdiniz?
- El "Karlsrue"də çıxış edən Dmitri Nazarovu. Yaxşı futbolçudur, güclü zərbələri var. Saytlarda maraqlanmışam, yaxşı da qiyməti var.
- Şəxsən siz nə vaxtsa Azərbaycan klublarına qarşı oynamısınz?
- Xeyr, oynamamışam.
- Həmyerlilərinizdən İqor Mitreski, Deyan Blajevski, İlça Naumovski və başqaları Azərbaycanda oynayıblar. Təsadüfən sizə bizim klublardan təklif gəlməyib?
- Xeyr, heç vaxt mənə dəvət gəlməyib. Amma həmyerlilərimdən ölkənizdə çıxış edənlərin olduğunu bilirəm. Bu fakt sevindiricidir. Əvvəllər sizin klublarda maliyyə vəziyyəti daha yaxşı idi. Amma indi bildiyim qədərilə, təkcə "Qarabağ"da vəziyyət yaxşıdı.
- Azərbaycan yığmasının son yoxlama oyununda Qazaxıstana uduzduğunu bilirsiniz?
- Xeyr, bilmirdim. Qazaxıstanın da yaxşı oyunçuları, şəraiti var. Ona görə də bu komandaya məğlub olmağa görə üzülməyə dəyməz, irəli baxmaq lazımdır. Azərbaycan bizə də uduzacaq (gülür). Düzdür, son seçmə mərhələdə uğursuz çıxış etdik. Amma indi yeni baş məşqçimiz var. Pandev də, mən də milliyə qayıtmışq. Yeni oyunçularımız da var. Hücum futbolu sərgiləyirik. Azərbaycana da qarşı hücum futbolu göstərəcəyik, aqressiv oynayacağıq.
- Son dövrlər Azərbaycan çempionatından Makedoniya yığmasına yalnız "Qarabağ"da çıxış edən Muarem Muarem dəvət alır. Ondan yığmamız barədə məlumat alacaqsınız?
- Muaremin "Qarabağ"da oynadığını bilirəm. Səhv etmirəmsə, üç il bu komandada çıxış edəndən sonra o, Türkiyəyə yollanmışdı. Amma hazırda yenidən "Qarabağ"dadır. Muarem mənə Azərbaycanda futbolun inkişafda olduğunu demişdi. Ölkənizdəki yaşayışdan, "Qarabağ"dan da danışmışdı. Ona belə bir komandada çıxış etmək xoşdur. Çünki hər mövsüm avrokuboklarda oynayırlar.
