Kərim Diniyev: Baş məşqçi komandaya irad bildirəndə, öncə mənə sözünü deyir
"Kəpəz"in yarımmüdafiəçisi Kərim Diniyev Topaz Premyer Liqasının 30-cu turu çərçivəsində "İnter"ə qarşı keçirdikəri oyunu (1:1) şərh edib. Azerisport.az saytına açıqlamasında o, bunları söyləyib:
"Oyuna yaxşı başlamışdıq. Qələbə qazanmaq istəyirdik. Amma bircə səhv bakılıların cavab qolunu vurması ilə nəticələndi. Halbuki, qələbə hesabını qorumağa çox yaxın idik. Çünki oyuna nəzarət bizim əlimizdə idi. Buraxdığımız qola gəlincə, Budaq Nəsirovla aramda anlaşılmazlıq yarandı. Oyundan sonra Şahin Diniyev məni tənqid etdi. Baş məşqçinin komandaya iradı olanda, ilk növbədə mənə sözünü deyir. Axı atamdır. Buna normal yanaşıram. Ata öz uşaqlarına qarşı tələbkar olmalıdır. Əminəm ki, atam Coşqun Diniyevin "Qarabağ"la çempion olmasına çox sevinəcək. Eyni zamanda mənim "Kəpəz"lə avrokuboklara vəsiqə qazanmağıma da".
