Səlahət Ağayev: AZAL-dan daha yaxşı oynadıq, amma onlar qalib gəldilər
"Sumqayıt"ın qapıçısı Səlahət Ağayev Topaz Premyer Liqasının 30-cu turu çərçivəsində AZAL-a qarşı keçirdikləri səfər oyunundan (0:1) sonra azerisport.az saytının suallarını cavablandırıb.
- Məğlubiyyətinizi nə ilə izah edərdin?
- Mənim fikrimcə, yaxşı oynadıq. Hətta rəqibdən daha yaxşı çıxış etdik. Amma qələbə onlara qismət oldu. Rəqibi qələbə münasibətilə təbrik edirəm. Biz də qələbə qazanmaq üçün əlimizdən gələni etdik. Amma son nöqtəni qoya bilmədik.
- Demək olar ki, bu oyunda uğur sizdən üz döndərmişdi?
- İstənilən halda artıq bu oyunu unutmalıyıq. Növbəti matç barədə düşünməliyik.
- Siz penaltini qaytarmaqla hesabın 0:2 olmasına imkan vermədiniz...
- Qapıçının işi rəqibin qol vurmamasına imkan verməməkdi. Mən də öz işimi gördüm.
- Matçın sonu gərgin keçdi. Siz Murad Səttarlı ilə nəyi bölüşə bilmirdiniz?
- Uduzanda əsəbi olursan. Muradla münasibətlərimiz yaxşıdır, heç bir problemimiz yoxdur. Yığma komandanın oyunçularıyıq. Nə oldusa, meydanda da qaldı.
- Qaydanı Murad pozduğu halda, hakim sizə sarı vərəqə göstərdi...
- Mən bu barədə heç nə deyə bilmərəm.
- Bəs Vaqif Cavadovla Qvanzav Maqomedov arasında nə baş vermişdi?
- Legioner futbolçunun yerli oyunçunu söyməsi heç kimin xoşuna gəlməz. Bura gəlmisənsə, futbolunu oynamalısan. Əcnəbi futbol oynamaq əvəzinə, bizi söyəcəksə, bu, mənə də xoş deyil. Vaqifin yerinə mən də olsaydım, elə edərdim.
- Sizcə, niyə elə vəziyyət yarandı?
- Onlar bura futbol oynamağa gəliblər, diqqətli olmalıdırlar. Belə hərəkətlərə yol vermək olmaz. Kim də nə edirsə, cavabını almalıdır. Mən nə edə bilərəm?
- Qarşıda sizi "Kəpəz"lə oyun gözləyir. Uğursuz gedişata son qoya biləcəksiniz?
- Ümid edirəm ki, qələbə bizə qismət olacaq. Yaxşı hazırlaşmağa çalışacağıq və meydana qələbə üçün çıxacağıq.
