Tural Axundov: Kəpəz 3 xala layiq idi, İnterin bəxti gətirdi

"Kəpəz"in kapitanı Tural Axundov Topaz Premyer Liqasının 30-cu turu çərçivəsində "İnter"ə qarşı keçirdikləri oyundan (1:1) sonra azerisport.az saytının suallarını cavablandırıb.

- Matçla bağlı fikirləriniz?
- Qələbə qazanmağı çox istəyirdik. Buna görə də "İnter"lə görüşə xüsusi hazırlaşmışdıq. Amma 1:1 də pis nəticə deyil. Çünki rəqibimiz "İnter" idi. Sadəcə, buraxdığımız qol artıq idi. "İnter" bizim buraxdığımız uşaq səhvini bağışlamadı.

- "Kəpəz"in qolunu yen siz, özü də penaltidən vurdunuz...
 - "Kəpəz"lə oyunda da penaltini vurmağı mənə həvalə etdilər. Şahin Diniyev sağ olsun. Bu, penaltidən vurduğum dördüncü qoldur.

- Qoldan sonra sizin üçün banner açan azarkeşlərə tərəf qaçdınz...
- Azarkeşlər məni dəstəkləyirlər. Bəzisi hətta mənə sms yazırlar. Sağ olsunlar. Ona görə də bu qolu azarkeşlərə həsr etməyə qərar verdim.

- "Qarabağ"la oyundan sonra müsahibə verməməyiniz avtoqollarla bağlı idi?
- Karyeramda elə şey olmamışdı. Həmin qollar mənə çox pis təsir etmişdi. "Qarabağ"la oyunu unutmaq istəyirəm. Hətta məşqlərdə də toparlana bilmirdim. Komanda yoldaşlarım sağ olsunlar ki, məni dəstəklədilər.

- Elə alındı ki, "Kəpəz"in qapısından qolu klubunuzun keçmiş forvardı Yuri Fomenko keçirdi...
- Bir səhvə yol verdik və 3 xal əldən getdi. Fomenko səhvimizdən yaxşı yararlandı.

- "İnter"ə çatmaq üçün əla şansı qaçırdınız. Qonaqların bəxtinin gətirdiyini demək olar?
- Əlbəttə. Qələbə qazanmalı idik. Qələbəyə layiq idik. Amma qonaqların bəxti gətirdi ki, heç-heçəyə nail oldular.

- "Kəpəz"in son dövrlərdə uğursuz çıxış etməsi nə ilə bağlıdır?
- Komandada yorğunluq var. Amma hələ gücümüz var, sonadək mübarizə aparacağıq.

- Qarşıda sizi "Sumqayıt"la oyun gözləyir...
- Qələbəyə oynayacağıq. Səhvsiz oynamağımız lazımdır. Belə olan halda üç xal qazana bilərik.