Aqil Məmmədov: Qarabağ ofsayddan qol vurdu
"Neftçi"nin qapıçısı Aqil Məmmədov Topaz Premyer Liqasının 30-cu turu çərçivəsində "Qarabağ"a qarşı keçirdikləri oyundan (1:2) sonra azerisport.az saytının suallarını cavablandırıb.
- Matçla bağlı nə deyə bilərsiniz?
- Bizi çətin oyun gözlədiyini bilirdik. Bütün həftəni bu oyuna hazırlığa həsr etmişdik. Pis oynadığımızı da deməzdim.
- Bəs daha yaxşı oynamağınıza nə mane oldu?
- Rəqib bizdən daha güclü və səviyyəlidir. Ağdam klubunun futbolçuları səviyyəcə üstündürdülər. Onları layiqli qələbə münasibəti ilə təbrik edirəm. Amma liderlə görüşdə bizim futbolçular da pis təsir bağışlamadılar.
- Rəqibin vurduğu ikinci qol qəribə olmadı?
- Onlar ofsayddan qol vurdular. Amma buna görə heç kimi tənqid etmək istəmirəm.
- Oyundan sonra klub rəhbərliyi futbolçularla görüşdü. Təsadüfən, məğlubiyyətə görə sizə əsəbləşmədilər?
- Xeyr, əksinə bizi yaxşı oyuna görə təbrik etdilər. Meydanda var gücümüzü qoyduğumuza görə təşəkkürlərini bildirdilər. Bunu növbəti matç öncəsi avans da adlandırmaq olar. Bu oyunu unudub, növbəti görüşə hazırlaşmalıyıq.
- "Zirə" və "İnter"in avrokuboklara buraxılmaması sizin şansınızı artırır?
- Biz digər komandaların çıxışı, aqibəti ilə maraqlanmırıq. Öz xallarımızı toplamağa çalışırıq. Sonda necə olacağını isə zaman göstərəcək.
- Komandanızın bu cür vəziyyətə düşməsi üzərinizdə təzyiq yaratmır?
- Əlbəttə, sabit çıxış etmək, xallar, qələbələr qazanmaq istəyirik. Vəziyyətin düzələcəyinə ümid edirik.
