Alessandro: Neftçidə daha çox qazanırdım, nəinki Yuventusda

"Neftçi"nin sabiq müdafiəçisi Alessandronun azerisport.az saytına müsahibəsi

- Karyeranızı başa vurmusunuz, ya oynamağa davam edirsiniz?
- Braziliyanın "Yuventus" klubunda çıxış edirəm. Hər şey normaldır. Ənənəvi olaraq müdafiənin və yarımmüdafiənin sol cinahında oynayıram.

- "Neftçi"dən ayrılmağınızdan xeyli vaxt keçib. Azərbaycan futbolu ilə maraqlanırsınız?
- Maraqlanıram. Futbolunuz inkişaf edir, klublarınız yaxşı çıxış edir.

- Azərbaycan futbolu Braziliyadan necə görünür?
- Məncə, sizin futbol İngiltərə futboluna bənzəyir. Çünki sizdə də onlardakı kimi baş məşqçilər taktika baxımından çox çalışırlar. Mən bunu Böyükağa Hacıyev və Arif Əsədovun "Neftçi"ni çalışdırdığı vaxtda görmüşəm.

- Bəs "Neftçi"nin hazırda yeddinci pillədə getməsi ilə bağlı nə deyə bilərsiniz?
- Bu komanda barədə ancaq xoş sözlər deyə bilərəm. Çünki onlarla iki dəfə Azərbaycan çempionu oldum. Yenidən Azərbaycana qayıtmaq, "Neftçi"də oynamaq istərdim.

- Sizcə, "Neftçi"nin işləri niyə indi yaxşı getmir?
- Mənim dövrümdə hər şey yaxşı idi. Təbii ki, komandanın hazırda yeddinci pillədə qərarlaşması pisdir. Amma onların hazırda niyə belə pis oynadığını bilmirəm.

- Hazırda sizin mövqeyinizdə həmyerliniz Aylton çıxış edir. Onu tanıyırsınız?
- Mənim mövqeyimdə braziliyalı futbolçunun oynadığını bilirdim. Amma onunla şəxsən maraqlanmamışam.

- "Neftçi" sizi qaytarmaq istəsə, gələrsiniz?
- Əlbəttə, qayıdaram. "Neftçi" ilə bağlı ancaq xoş xatirələrim qalıb.

- Amma bu komanda hazırda hətta avrokuboklar zonasına düşməyə də çətinlik çəkir...
- "Neftçi" kimi klub üçün avrokuboklardan kənarda qalmaq çox pis olar. Çünki bu komanda həmişə çempion olmağa, kuboku qazanmağa çalışıb.

- Xatirinizdə daha çox hansı oyun qalıb?
- Unuda bilmədiyim çox oyun var. Amma Bakıda "Xəzər Lənkəran"a 5:0 hesabıyla qalib gəldiyimiz oyunu xüsusi xatırlayıram. Unudulmaz matç idi.

- Yəqin ki, "Yuventus"da maliyyə şərtləri "Neftçi"dəki kimi deyil?
- Əlbəttə, "Neftçi"də daha yaxşı qazanırdım.