Salukvadze: Gəncədə bizi çətin oyun gözlədiyi dəqiqdir
"İnter"in müdafiəçisi Laşa Salukvadze Topaz Premyer Liqasının 30-cu turu çərçivəsində "Kəpəz"ə qarşı keçirəcəkləri oyun öncəsi fikirlərini bölüşüb. Azerisport.az saytına açıqlamasında o, bunları söyləyib:
"Kəpəz" çox yaxşı komandadır. Amma buna baxmayaraq, biz bu çətin səfər oyununda qələbə qazanmağa çalışacağıq. "Kəpəz" son iki oyunda uduzsa da, onların bizimlə matça motivasiyasız çıxacağını düşünmürəm. Əksinə, həm evdə oynadıqlarına görə, həm də uğursuz gedişata son qoymaq üçün mütləq qalib gəlməyə çalışacaqlar. Gəncədə yerli komandaya yaxşı azarkeş dəstəyi olur. Bizi çətin oyun gözlədiyi dəqiqdir".
Salukvadze komandaya UEFA tərəfindən verilən cəzaya da münasibət bildirib: "Klubumuz bu qərardan apelyasiya şikayəti edib. Necə olacağını zaman göstərəcək. Amma biz yenə də "İnter"in yayda avrokuboklarda çıxış edəcəyinə ümidliyik. Avrokubokları buraxacağımız halda özümün komandada qalıb-qalmayacağıma gəlincə, bu barədə hələ dəqiq bir söz deyə bilmərəm. Çünki bu barədə rəhbərliklə danışmaq lazımdır. "İnter"in bütün gürcü futbolçuları ilə müqaviləsinin müddəti may ayında başa çatacaq. Kimin qalacağını, kimin gedəcəyini zaman göstərəcək".
Salukvadze vaxtilə oynadığı Rusiyanın "Volqa" klubunun ona olan borcunu hələ də qaytarmadığını bildirib: "Volqa"dan hələ də öz pulumu almamışam. Hələ də danışıqlar davam edir. Onların mənə dəqiq nə qədər borclu olduğunu, məbləği açıqlamaq istəmirəm. Sadəcə, onu deyə bilərəm ki, böyük məbləğdir".
