Qurban Qurbanov: Ad günümü işdə keçirdim
"Qarabağ"ın baş məşqçisi Qurban Qurbanov Topaz Premyer Liqasının 30-cu turu çərçivəsində "Neftçi"yə qarşı keçirəcəkləri oyun öncəsi azerisport.az saytının suallarını cavablandırıb.
- Qarşıdakı oyuna hazırlıq necə gedir?
- Hər şey normaldır. Yaxşı hazırlıq keçmişik. Heç bir problemimiz yoxdur. Hər şey plan üzrə gedir.
- Heyətdə itki var?
- Samuel Armenterosun ayaq əzələsində problem var. Böyük ehtimalla qarşıdakı oyunu buraxacaq. Miçel də sarı vərəqə limitini doldurub. Buna görə o, qarşıdakı oyunda komandaya kömək edə bilməyəcək.
- Növbəti rəqibiniz qeyri-sabit çıxış edir. Bu, sizin üçün hansısa üstünlük yaratmır?
- "Neftçi"nin o dərəcədə pis vəziyyətdə olduğunu deməzdim. Onlar səfərdə "İnter" və "Xəzər Lənkəran" kimi rəqiblərə qalib gəliblər. Komanda Vəli Qasımovun tələb etdiyi oyunu sərgiləməyə başlayıb. Bizə asan olacağını düşünmürəm. Bütövlükdə, "Neftçi" ilə oyunlarımız həmişə maraqlı və çətin keçir. Bizi mövsümün ən çətin oyunlarından biri gözləyir. Ona görə də diqqətli oynamalıyıq.
- Ötən gün 44 yaşınız tamam oldu. Adətən futbolçular baş məşqçilərinə ya qalstuk hədiyyə edirlər, ya da qələbə...
- Ad günüm artıq geridə qalıb. Oyun isə qarşıdadı. Qalstuk geyinməyi isə sevmirəm.
- Ad gününüzü necə keçirdiniz?
- İş proqramımdan kənara çıxmadım. Ad günümü işdə keçirdim.
- 44 maraqlı rəqəmdir. Bununla bağlı xüsusi bir fikriniz oldu?
- Xeyr, olmadı. Sadəcə, illərin necə gəlib keçdiyini düşündüm. Allah bizə həyat bəxş edib və biz də onu düzgün keçirməyə çalışmalıyıq.
