Robert Prosineçki: Həyat yoldaşım cəbhədə baş verənlərdən qorxmuşdu
Azərbaycan yığmasının baş məşqçisi Robert Prosineçki aprelin əvvəlində cəbhə bölgəsində baş verən hadisələrdən danışıb, millimizin DÇ-2018-in seçmə mərhələsindəki şanslarına toxunub. Azerisport.az xəbər verir ki, xorvatiyalı mütəxəssis öncə bunları söyləyib:
"Harada, dünyanın hansı nöqtəsində baş verməsindən asılı olmayaraq, müharibə, insanların ölümü həmişə pisdir. Azərbaycandakı hadisələr paytaxtdan çox uzaqda, ölkənin qərbində baş verir. Buna baxmayaraq, həyat yoldaşım buna görə bir qədər qorxurdu. Çünki uşaqlarımız Bakıda məktəbə gedirlər. Lakin hazırda onlar Xorvatiyadadırlar və bir neçə gün məktəbi buraxmalı olacaqlar".
Millimizin çalışdırıcısı yeni seçmə mərhələyə hazırlıqdan da söz salıb: "Biz düzgün addımlar atmağa çalışırıq və hesab edirəm ki, doğru yoldayıq. Vaxtilə Xorvatiya yığmasına qarşı yaxşı oyun sərgiləyə biləcəyimizi söyləyəndə bunu meydandakı oyunumuzla da sübut etdik. Qarşıda bizi DÇ-2018-in seçmə mərhələsi gözləyir. Qrupumuzdakı komandaların heç biri üçün bizimlə oyun asan olmayacaq, heç bir rəqib bizə asanlıqla qalib gələ bilməyəcək. Eyni zamanda çox çətin qrupda yer aldığımızı qeyd etmək istərdim. Çexiya, Norveç, Şimali İrlandiya, Almaniya, San-Marino kimi komandalarla mübarizə aparmalıyıq".
Xorvatiyalı mütəxəssis ölkəsinin yığma komandasının Fransada keçiriləcək AÇ-2016-dakı şansları barədə də söz açıb: "Xorvatiya yığmasının taleyinə Türkiyəyə qarşı keçiriləcək ilk oyun böyük ölçüdə aydınlıq gətirəcək. Türkiyə yığması son illərdə çox güclüdür. Qrupdan çıxmağımız məhz bu rəqiblə görüşdən asılı olacaq. Bu komandaya qalib gəlsək, qrupdan çıxa bilərik".
(Max)
