Mətin Gülər: Azərbaycan yığması AÇ-yə indidən tam hazırdır
Azərbaycanın 17 yaşadək futbolçulardan ibarət yığma komandasının yarımmüdafiəçisi Mətin Gülər azerisport.az saytına müsahibəsində Bakıda keçiriləcək Avropa çempionatından, rəqiblərdən və komandadakı ab-havadan danışıb:
- Yığmamız Portuqaliya, Belçika və Şotlandiya ilə bir qrupa düşdü. Şanslarınızı necə qiymətləndirirsiniz?
- Çox çətin qrupdur. Digər qruplarla müqayisədə bizim qrupumuz bir qədər yaxşı görünə bilər. Amma əslində bu qrup da çətindir.
- Bu qrupdan çıxmağa gücünüz çatacaq?
- Əlbəttə. Yaxşı şansımız var. Hətta qrupdan çıxacağımızı dəqiq söyləyə bilərəm. Buna tamamilə əminəm.
- Yığmamız AÇ-2016-ya fiziki, taktiki və psixoloji baxımdan tam hazırdı?
- Mənə elə gəlir ki, biz hamımız AÇ-yə tam hazırıq.
- Qrupda hansı komanda ilə oyunun daha çətin olacağını düşünürsünüz?
- Şübhəsiz ki, Portuqaliyaya qarşı oyunun. Biz onlarla əvvəl qarşılaşmışıq. Revanş almaq lazımdır.
- AÇ sizin üçün tramplin ola bilərmi? Qitə birinciliyindən sonra Avropanın daha güclü klublarından birinə keçəcəyinizə ümidiniz var?
- Əlbəttə, mənim də öz hədəflərim var. Amma hansı klubların xoşuna gələcəyimi bilmirəm. İndi Azərbaycan yığmasına faydalı olmaq barədə düşünürəm. Ümid edirəm ki, gələcəkdə İngiltərə və Almaniya klublarından hansındasa çıxış edə biləcəyəm.
- Yəqin ki, Türkiyə yığmasının qardaş ölkədə keçiriləcək AÇ-yə vəsiqə qazana bilməməsi sizi məyus edir...
- Bəli, Türkiyə yığmasının final mərhələsinə vəsiqə qazana bilməməsi məni doğrudan da məyus etdi. Onlara qarşı oynamağı çox istərdim. Amma nə etmək olar? Görünür, qismət deyilmiş.
- AÇ-də hansı qrupu "ölüm qrupu" hesab edirsiniz?
- Fikrimə, İtaliya, Hollandiya, İspaniya və Serbiya yığmalarının mübarizə aparacağı D qrupu. Bu, doğrudan da çox çətin qrupdur.
- Məlum olduğu kimi, aprelin əvvəlindən cəbhə bölgəsində vəziyyət gərginləşib, şəhidlərimiz var. Bu, komandaya necə təsir edib? Düşərgədə problem yaratmır ki?
- Xeyr. Əksinə, bu, bizə daha böyük motivasiya verir. Biz Azərbaycan xalqını sevindirmək istəyirik. Onların bu Avropa çempionatının həyəcanını bizimlə birgə yaşamasını istəyirik.
- Azarkeşlərin stadionu dolduracağına əminsiniz? Məsələn, komandamız ötən il elit mərhələyə yüksələndə tribunalarda demək olar ki, azarkeş yox idi...
- Əminəm ki, Azərbaycan xalqı stadiona gəlib, bizi dəstəkləyəcək. Çünki biz ilk dəfə AÇ-də çıxış edəcəyik və doğma meydanda oynayacağıq. Belə tarixi oyunlarda bizə dəstək çox lazımdır.
